Heyva Sor a Kurd şaristanê Qamişlo de xo resna hezar û 900 keyeyan ke Efrîn ra koçber bîyê û înan rê hetkarî vila kerde. Berpirsê Heyva Sor a Kurd Dilşad Dawidî dîyar kerd ke ê do xo biresnê pêroyî keyeyanê ke Efrîn ra koçber bîyê û hetkarîya muhîme bidê înan. Sewbîna zî sazgehî eşkera kerd ke hetkarîya ke kurdanê Rusya erşawitbî, aye zî Kobanî de ameya vilakerdene.
Xebatê Heyva Sor a Kurd Rojavayê Kurdîstanî de dewam kenê. Sazgehî derheqê xebatanê xo de agahî daye û dîyar kerd ke xebatê hetkarî ya seba koçberanê Efrînî yê ke merkezê sitare yê Qamişlo de manenê, bêmabên dewam kenê. Sazgehê merdimîye da zanayene ke înan 7ê nîsana 2026î de dest bi na xebate kerda û heta nika xo resnayo hezar û 900 keyeyan. Mesajê Heyva Sor de wina ame vatene:
‘Ma do hetkarî biresnê heme hewcedaran’
Eşkerayî de mesajê paştîdayîşî û hevî vejîya vernî û ame dîyarkerdene ke xebata hetkarî heta bireso heme hewcedaran do dewam bikero. Heyva Sor a Kurd soz da ke ê do kîşta şarê xo de bibê û nê mesajî pare kerd:
“Ma do heta ke xo biresnê her kesî ke hewcedarîya înan bi hetkarî est a. Ma bi esasgirewtişê mesajê paştîdayîşî û hêvîye xebatanê xo domnenê. Heta ke şarê ma yo birûmet agêro warê xo ma do xebatanê xo gird bikerê.”
Do şaristananê bînan de zî xebate bikerê
Berpirsiyarê sazgehî Dilşad Dawidî dîyar kerd ke Rojavayê Kurdîstanî de xebatêka hîra kenê û cehd kenê ke xo biresnê heme keye û kesanê hewcedaran. Dawidî îfade kerd ke hetkarîya keyeyê ke Efrîn ra koçber bîyê, sey hedefêko sereke dayo vernîya xo û heta nika bi hemkarîya Kanal 8î xo resnayo hezar û 900 keyeyan. Dawidî vat ke badê kar û xebatanê înan ê ke Qamişlo de temam bîyê do eynî xebate şaristananê bînan yê Rojavayê Kurdîstanî de zî bikerê.
Kurdanê Rûsya hetkarî resnaye domananê Rojava
Heyva Sor a Kurd dîyar kerd ke kurdanê Rusya seba ke bireso domananê Rojavayê Kurdîstanî hetkarî erşawite û na hetkarî hetê Heyva Sor a Kurdî ra ameya vilakerdene. Parekerdişê derheqê xebate de ame dîyarkerdene ke hetkarî seba keyeyanê hewcedaran Kobanî de ameya vilakerdene.
