Cagirê Fermandarê Pêroyî yê Hêzanê Ewleyîya Zereyî yê Şaristanê Hesekê Mehmûd Xelîl, dîyar kerd ke karwanê koçberanê Efrînî yo dîyin ke nika herêma Vakur û Rojhelatê Sûrîye de yo, siba ver bi ca û waranê xo keweno rayîr.
Cagirê Fermandarê Pêroyî yê Hêzanê Ewleyîya Zereyî yê Şaristanê Hesekê Mehmûd Xelîlî, derheqê agêrayîşê grûba koçberanê Efrînî ya dîyine de hesabê xo yê medyaya dîjîtal (X) ser o eşkerayîyêk weşanaye û derheqê wext û cayê rayirkewtişê kerwanê dîyinî de agahîyî pare kerdê.
‘Karwano dîyin keweno rayîr’
Xelîlî, Peymana 29ê Çeleyî ard vîr û nê agahîyî dayê: “Çarçewaya bicardişê berpirsîyarîya ma ya merdimîye û wezîfeyê ma yê neteweyî ya hemverê şarê xo û seba dewamkerdişê cehdê semedê organîzekerdişê agêrayîşê koçberan, do kerwanê şarê ma yê koçber o dîyin ver bi Efrîn bikewo rayîr. Na game çarçewaya pêameyîşî de ke verê amebi kerdiş, yena eştene, bi taybetî badê erjnayîşanê pozîtîf ê agêrayîşê karwanê yewin ke bi ewle ca û warê xo de bica bîyî.”
‘Do 200 keyeyê bikewê rayir’
Xelîlî, hûmara koçberanê de ke agêrenê warê xo ser o wina vat: “Karwano ke 200 keyeyan ra yeno pê, do siba saete 06:00î de Çatrayîrê Şehîd Yûsif Gulo yê şaristanê Qamişlo de kom bibê û uca ra do rayirê M4î ra verê xo bidê şaristanê Efrînî. Ma teqez kenê ke ma do xebatanê seba agêrayîşêko ewlehî û organîzekerdenê ê heme şarêxo bidomnê. Ma, şarê xo yê ke nameyê xo mîyanê karwanî de qeyd kerdo, înan ra wazenê ke wexto dîyarkerde û cayê ke ameyê nîşankerdene, uca de amade bibê ke karwan goreyê programo ke ameyo amadekerdene, bikewo rayîr. Ma, seba înan hêvîya selametî û ewlehîye wazenê.”
