HSD’yî vat: “Serkewtişo ke 11 serrî ra ver ame girewtene, seba pawitişê azadîye, pawitişê destkewteyanê şehîdan û awankerdişê ameyoxêko demokratîk û biewle ê şaranê Sûrîye sozêko newe yo.”
Fermandarîya HSD’yî ya Pêroyî bi munasebetê serrgêra xelaskerdişê bajarê Kobanê ya 11. eşkerayîye weşanaye:
“Serrgêra xelaskerdişê Kobanî ya 11., vera rêxistina terorîste ya DAIŞ’î tarîxê têkoşînê vera terorîzmî yê cîhanî de gamanê tewr muhîman ra yew bî. Na serkewtena tarîxîye destpêkê rijîyayîşê raştikên ê rêxistina terorîste ya tewr xofin û wehşîyane bîye ke dinyaya moderne heta nika nas kerda. Dîyar kerd ke îradeyê şaranê azad û rêxistinbîyayan, vera heme çetinîyan zî eşkeno projeyanê tarî û wehşîyan bin fîno.Şerê Kobanî şerêko tesbîtkar bî. Tena pawitişê bajarêk nêbî, eynî wext de pawitişê nirxanê însanîyetî û heqê cuye, azadîye û rûmetê şaran bî zî. Tarîxî de gamêka krîtîke de şervanê Yewînê Pawitişê Şarî (YPG) û Yewînê Pawitişê Cinîyan (YPJ) vera projeya jenosîdo sîstematîk vindertî, rayîrê xelaskerdişê herêmanê hîrayan ê Sûrîye akerdî û vernîya ci girewt ke gonî hîna zêde bila nêbo.
Ma bi rêz û hurmetêko zaf heme şehîdanê şerê vera DAIŞ’î, şehîdanê şerê Kobanî û heme şehîdê ke seba pawitişê rûmetî û cuya hempare ganê xo feda kerd, anê xo vîrî. Eynî wext de ma heme şervanê cinî û camêrdê ke barê nê pêkewtişê tarîxî girewt, selam kenê.Serkewtena Kobanî bêşik îsbat kerd ke DAÎŞ tena rêxistinêka eskerîye nêbîye, la vera însanîyetî, nirxê ey û ameyoxê ey projeya tarî bîye. Binkewtişê ey ê Kobanê de tena binkewtişêko eskerî nêbî, eynî wext de binkewtişêko îdeolojîk û exlaqî bî ke bingeyê ey rijîya û şuurê ey o ke bingeyê teror û tersî ser o bî, şikit. Bi no hewa Kobanê destpêkê raştikêne yê peynîya DAIŞ’î bîye û seba dinya mesajêko girs bî ke şîdet nêeşkeno vera îradeyê şaranê azadan vindero.
Ewro, badê 11 serranê a serkewtena tarîxîye, bajarê Kobanî reyna binê hêriş, dormegirewtiş û zordarîya bêmabêne de ya. No, nimûneyêko eşkera yê cehdê binvistişê îradeyê şarê ey û haştî yo ke bi fedakarîya girde ameya girewtene. Hêrişê ke ewro Kobanî ser yenê kerdene, vera sembolê serkewtişî hêrişêko rasterast o ke vera DAIŞ’î ameyo girewtene. Bajarêk ra cehdê heyfgirewtişî yo ke projeya DAIŞ’î bin visto û parçeyêkê cehdê binvistişê projeya haştîye, akerdişê beranê kaosî û agêrayîşê terorîzmî yo.
Na çarçewe de ma qerardarîya xo ya dewamê têkoşînê vera DAIŞ’î tekrar kenê û hîşyarî danê ke her rewşêka bêaramîye ya Rojava bena tehdîtê emnîyetê herêmkîye û mîyanneteweyîye û firsendê raştikênî virazena seba rêxistinanê terorîstan ke reyna kom bibê û çalakîyanê xo dewam bikerê.
Ma sey Fermandarîya Pêroyî ya HSD’yî mesajêko zelal û eşkera şawenê komelê mîyanneteweyî. Pawitişê destkewteyanê serkewtişî ke vera DAIŞ’î ameyo girewtene û temînkerdişê ewleyî û stabîlîteyê herême ke nê şerî de bedelê giranî dayî weçînayîşêko sîyasî nîyo, berpirsîyarîyêka exlaqî û huqûqî ya hemparîye ya. Bêvengîya vera rewşa Kobanî goreyê fedakarîyanê ke seba serkewtişê terorîzmî nîyo û cehdê mîyanneteweyî yê têkoşînê vera terorîzmî xirab keno.
Peynî de, ma sey HSD’yî îlan kenê ke Kobanî do tim sey sembolêko domdar ê xoverdayîşî bimano û serkewtena ke 11 serrî ra ver ameye girewtene tena vîrardişêko ke bêro vîrardene nîyo, ma sozê xo newe ra danê ke ma do seba pawitişê azadîye, pawitişê destkewteyanê şehîdan û awankerdişê ameyoxêko biemnîyet û demokratîk ê heme şaranê Sûrîye bixebitîyê.”
