Rejîmê Îranî saetanê şewe de Silêmanîye de Kampa Komela Zehmetkêşan a Kurdîstanî û dewa Zirguwêzî û Hewlêr de Teyarayê Harîrî hedef girewtî.
Hêrişê kampî de yew kabîn veşa, kesêk nêmeerd. Dewa Zirguwêzî ke sinorî de yo, bi teyarayanê bêpîlotan û çekanê cîya-cîyayan ame bombardûmankerdene, sinorî de çar teqayîşê girdî ameyê eşnawitene.
Teyaragehê Harîrî yê Hewlêrî ke hêzê koalîsyonî tede yê zî şewe ame hedefgirewtene. Serê sibayî zî Hewlêr de vengêko gird ê teqayîşî ame eşnawitene, çimeyanê herême vat ke hêrişê teyarayanê bêpîlotan bî la sîstemê pawitişê hewayî yê koalîsyonî çin kerd.
Badê hêrişanê Amerîka û Îsraîlî yê vera Îranî şer Iraqî û Başûrê Kurdîstanî ra vila beno. Rejîmê Îranî binge û kampanê partîyanê Rojhelatê Kurdîstanî bombardûman kena. Iraq de zî tayê bingeyê hêzanê Haşdî Şeabî ameyê hedefgirewtene û zaf vindîbîyayîşî ameyê raportekerdene.
