Endama Dîplomasî ya KJAR’î Jiyan Hewraman dîyar kerd ke kurdî têkoşînêko dergûdila û bêemsale danê û wina vat: “Tecrubeyê têkoşînê kurdan demokrasî û azadîye asan keno. Kurdî eşkenê rayîrê demokratîkbîyayîşê Rojhelatê Mîyanênî akerê.”
Rojhelato Mîyanên ke medenîyet, dewlete, kultur û komelbîyayîş tede ameyo destpêkerdene, ewro bîyo warê şer û pêkewtişan. Mudaxaleyê hezanê mîyanneteweyî yê herême, şerê bi destê serdest û sermîyandaran yeno domnayene, herême kerda merkezê kaosî. Cayêko kultur, ziwan, bawerî, medenîyet vilayê dinya bîyo, înan ra yew bîyo herêmanê tewr zêde yê mudaxaleyê hêzanê mîyanneteweyî. Têkoşînê şar û komelî yê vera şer û pêkewtişanê hêzanê hegemonan bêmabên dewam keno. Ewro no têkoşîn ameyo qonaxêko muhîm.
Endama Dîplomasî ya Komela Cinîyanê Azad a Rojhelatê Kurdîstanî (KJAR) Jiyan Hewreman derheqê averşîyayîşanê Rojhelatê Mîyanên û Rojhelatê Kurdîstanî de ajansê ma rê qisey kerd.
‘Tecrubeyê kurdan vernîya rayîrê demokrasî û azadîye akenê’
Jiyan Hewraman dîyar kerd ke şarê kurdî wayîrê têkoşînêko dergûdila yo, qonaxêka hesas û dîyarker ra derbas benê û wina vat: “No qonax tena seba şarê kurdî ney, seba heme herêma Rojhelatê Mîyanên zî wayîrê tesîranê stratejîk a. Şertanê dinya de xeylê hêzî cehd kenê ke herême goreyê menfeetanê xo bikar bîyarê. Amancê hêzanê sey Îsraîl û Amerîka o yo ke bi rayîrê vurnayîşê herême hegemonyaya xo bipawê. Eynî wextî de, netewe-dewletanê herême vera şaran hêrişanê xo domnenê. Na çarçewa de kurdî, sey hêzêko komelî û sîyasî wayîrê rolêko girdî yê. Ez eşkena vaja ke şarê kurdî wayîrê tecrubeyêko bihêz yê têkoşînî yo ke eşkeno rayîrê resayîşê demokrasî û azadîye asan bikero. Bi têkoşînê dergûdila yê şarê kurdî ra heta nika hişyarîya sîyasî û komelî mîyanê komelê kurdî de zaf zêde bîyo. Naye ra zaf muhîm o ke şarê kurdî bi hesasîyetê sîyasî têbigêro, yewîya xo û destkewteyanê xo bipawo. Na çarçewa de projeyê netewa demokratîk eşkeno bibo cewabê problemanê herême û rayîrê çareserî akero.”
‘Yewîye netîceyê têkoşînê serran a’
Dewamê qiseykerdişê xo de Jiyan hewreman da zanayene ke îlankerdişê yewîya sîyasî yê partîyanê kurdan gamêka muhîm a û wina vat: “Netîceyê tecrubeyê têkoşînê serran ameyo amadekerdene. Na yewîye tena seba şertanê nikayînan nîya, seba awankerdişê prosesêko derg ê çareserîya demokratîk zî muhîm a. Tarîx mojneno ke menfeetê komelî seba hêzanê dewlete, muhîm nêbîyê û îradeyê înan tu wext nêameyo naskerdene. Sewbîna wextê verî yê tarîxî ra heta nika zî ma dî ke bi piştîpêdayîşê şarê kurdî, wayîrê hêzbîyayîşî senî vejîyayo meydan. Îttîfaqê sîyasî bi amancê pawitişê ameyoxê şarê kurdî û pawitişê destkewteyan ameyo ronayene. Yewîya neteweyî eşkena biba bingeyê ke şarê kurdî û şertanê kaotîk de bieşko rayîrê xo bivîno.”
‘Hêzo bingeyin şarê kurdî yo’
Jiyan Hewraman dîyar kerd ke amancê înan o yo ke veng û waştişanê kurdan astê dinya de biresnê platformanê cîyayan û derheqê babete de nê çîyî vatî: “Ma wazenê hêzanê bînan reyde têkilî virazê ke paştî bidê çareserîya demokratîke. Eynî wextî de ma zanê ke hêzo bingeyin şarê kurdî yo. Dîplomasîya bê paştîdayîş û hişyarîya şarî nêeşkena serkewte ba. Naye ra xebatê ma hem warê dîplomasî de hem zî mîyanê komelî de dewam kenê.”
‘Çareserî bi sîstemêko demokratîk mumkin a’
Jiyan Hewreman vîr vist ke bingeyê şeran menfeetê dewletan ê û wina dewam kerd: “Hêzê dinya cehd kenê ke serê herêma Rojhelatê Mîyanên de bandure xo saz bikerê û rayîrê averşîyayîşanê muxalîfanê xo bigîrê. La şarê kurdî qerarê xo dayo ke nêbê hacetê plananê tu hêzan. Seba ke projeyê dewletan heta nika tu çareserî xo reyde nêarda. Eke Îran de vurnayîşêko sîyasî virazîyo, no eşkeno îmkanan peyda bikero ke problemê şarê kurdî bi hewayêko demokratîk bêro munaqeşekerdene. Heta ke statuyê şarê kurdî nêro naskerdene û heqê sîyasî, kulturî û komelî yê kurdan nêrê garantîkerdene. Îran de demokrasî nêyeno ca. Coka qederê şarê kurdî û şaranê binan ê Îranî yewbînan reyde girêdaye yê. Çareserîyêka raste tena bi naskerdişê heqanê heme şaran û ronayîşê sîstemêko demokratîk mumkin a.”
‘Waştişê azadîye û demokrasî gandar a’
Jiyan Hewraman da zanayene ke wexto peyên de tedayê rejîmê Îranî serê şarî de zêde bîyê û wina vat: “Xeylê kesî ameyê destbendkerdene, girewtene yan zî kiştene. Bi taybetî girewteyê sîyasî şertanê çetinan de yenê girewtene û zaf reyan tehdîdê îdamî reyde rî bi rî manenê. Heto bîn ra înternet ameyo birnayene. Semedê ke dewleta Îranî, veng û rengê şaran sansur kena. Herême mîlîtarîze kerdo xeylê cayî bi hêzanê leşkerî ra ameyê girewtene û înternet zaf reyan yeno birnayene ke şar vengê xo nêresno dinya. Sewbîna hêrişê serê cinîyan zêde bîyê. Rejîm baş zano ke mîyanê komelî de cinî hêzê vurnayîşî yê. Naye ra rejîm zaf reyan tedayanê xo serê cinîyan de zêde keno. La têgêrayîşê komelî yê bingeyê felsefeyê “Cinî Cuye Azadî” ser o mojneno ke waştişê azadîye û demokrasî mîyanê şaran de gandar o.”
‘Cinî Cuye Azadî sembolê piştîdayîşê şaran o’
Jiyan Hewraman peynîya qiseykerdişê xo de bale ante serê muhîmîya têkoşînê seba azadîye û demokrasî yena dayene û wina vat: “Hêzê sîyasî û komelî yê kurdî xeylê xebatanê muhîman kenê ke bieşkê hem şarê kurdî bipawê hem zî vernîya rayîrê çareserîya demokratîk akerê. Xebatanê bingeyînan ra yew zî awankerdişê yewîya neteweyî ya. Amanco bingeyin o yo ke şarê kurdî hêzê xo, yewîya xo bipawo. Çareserîya demokratîk û ciwîyayîşo hempar ê şaran zî rayîrê tewr rast o ke eşkeno aştî û aramî herême de domdar bikero. Lazimo ke ma xo vîr ra nêkerê ke “Cinî Cuye Azadî” sembolê piştîdayîşê şaran o.”
