Îttîfaqê Hezanê sîyasî yê Rojhelatê Kurdîstanî bi mesajêke bale ante serê şertanê ke Îran de virazîyayê û vengdayîşê heme şaran kerd ke têkoşînêk hempare rayraberê. Mesaj de bi taybetî têkilîya kurd û azerîyan ame vîr vistene û ame waştene ke seba welatêko demokratîk, têduşt û azad têkoşînêk hempar rayraberê.
Îttîfaqê Hezanê Sîyasî yê Rojhelatê Kurdîstanî bi mesajêke helwêstê xo yê sîyasî yê derheqê Îranî de şar û hezanê sîyasî yê Îranî rê eşkera kerd. Eşkerayî sere de vengdayîşê tirkanê azerî û heme şaranê binan ame kerdene ke seba welatêk azad, têduşt û demokratîk pêro pîya têkoşîn bikerê.
Mesaj wina yo:
“Îttîfaqê Hezanê Sîyasî yê Rojhelatê Kurdîstanê Îranî, reyna serê bingeyê prensîbanê têgêrayîşê neteweyî û demokratîk yê Kurdîstanî û fehmkerdişê berpirsyarîya ey yê tarîxî, ganî rewşa hesase de qetî serê hewceyîya yewîye û hemgirewtene keno. Ma na bawerî de yê, ameyoxêk aram yê seba Îranî, tena bi awankerdişê sîstemêko demokratîk yê serê naskerdişê resmî yê heqanê neteweyî yê neteweyan, edalet, têduştî û garantîkerdişê azadîyanê bingeyinî eşkenê bêrê destkewtene. Îttîfaqê Hezanê Sîyasî yê Kurdîstanê Îranî seba awankerdişê Îranêko azad, demokratîk û zafreng, amadekarîya xo yê heme hezanê sîyasî, sivîl û demokratîke rê eşkera kenê.
Ma heme na rastîya tarîxî yê çend şaristan û herêman zanê, bi taybetî ye Azerbaycan û Kurdîstanî, azerî û kurdî, pêroyî tarîxî de pîya ciwîyayê. Naye ser ameyoxê nê herêman ganî serê bingeyê hemkarîya rayberîya hempare û garantîkerdişê heqanê têduştî yê heme komelî bo. Îttîfaqê partîyanê Kurdîstanê Îranî nê heramanê têmîyanî, paştî dano ronayîşê mekanîzmayêk rayberîya hempare yê xo cayî ke temsîlîyetê nifûse û îradeyê şarî dano mojnayene.
Îttîfaqê Hezanê Sîyasî yê Kurdîstanê Îranî na bawerî de yê ke aramî û ewleyîya domdare, tena wextê ke heme şarê herême, kurd û tirkê ke Azerbaycan de, Kurdîstan û herêmanê bînan de, wayîrê heqanê sîyasî, kultur û ziwanî seyyewbînî bê, sewbîna zî bi raya sazgehanê demokratîk xo rayra berê, eşkenê berê garantîkerdene.
Ma sey her wextî, destê hemkarî şarê tirkanê-Azerbaycanî û hezanê înan yê sîsyasî derg kenê, sewbîna zî amadekarîya xo seba heme dîyalog, pêkerdiş û ronayîşê mekanîzmayêk asayîşo pêroyî ke aramîya cayanê hempar garantî bikero, eşkera kenê. Ameyoxê herême ganî serê ciwîyayîşê hempare, rêzgirewtiş û tewrbîyayîşo têduşt yê heme şaran reyde bêro ronayene. Bi tesdîqkerdişê têkilîyanê tarîxî û girêdayê komelî yê mabênê kurd û azerîyan de, goreyê ma ra ganî ameyoxê têkilîyan mabênê her di şaran de, serê bingeyê dîyalog, rêzgirewtişo hempar û cuyêka aştîye de bê. Nê çarçewaya de reyna ma girêdayîşê xo yê muhtewa û ruhê peymana dostanî yê mabênê Komara Kurdîstan û Hukmatê neteweyî yê Azerbaycanî rê eşkera kenê.Ma naye sey xerîterayêke û sembolê hemkarî û fehmkerdişê yê mabênê têgêrayîşanê demokratîk ê Kurdîstan û Azerbaycanî vînenê.
Îttîfaqê Hezanê Sîyasî yê Kurdîstanê Îranî bihêzkerdişê hemkarîya mabênê hêzanê demokratîk û averberdişê dîyalog mabênê neteweyan yê seba ronayîşê mekanîzmayêk hempare yê seba cuyêka têduştî sey yew estuna bingeyine yê seba destfînayîşê ameyoxêk azad û têduşt yê seba heme neteweyanê Îranî vînenê. Nê çarçewaya ke ma heme metodê hemkarî û hewldanan nê wareyî de pêşwazî kenê.
Ma sey Îttîfaqê Hezanê Sîyasî yê Kurdîstanê Îranî, derheqê netew û welatanê cîran de zî vanê, ganî cîranîne başe û rêzgirewtişêk yê menfîetê heme welatanê herême de bibo. Goreyê ma ra, aştî û aramîya herême, tena eşkeno bi raya dîyalog , hemkarî û hurmetê di hetî yê mabênê netew û dewletan de xurt bibo.”
