Stenbol de 1ê Gulane Îskeleya Kadikoy de bi coş ame pîrozkerdene. Polîsan demo ke pîrozkerdiş dewam kerdêne qade de hêrişê ciwanan kerd û tewr tay 5 kesî bi îşkence destbend kerdê.
1ê Gulane sey Roja Yewîye, Piştgirîye û Têkoşînê Karkeran Kurdîstan, Tirkîyea û xeylê merkezanê dinya de bi rayîrşîyayîş, eşkerayî û mitîngan yeno pîrozkerdene. Stenbol de zî bi rayberîya KESK, DÎSK, TTB û TMMOB 1ê Gulane bi sloganê “Seba kede, edalet, aştî û demokrasî bibê yew û bivurnênê” Îskeleya Kadikoy a Stenbol de ame pîrozkerdene.
Pîrozkerdişî de fotografê Rayberê Şarê Kurdî Abdullah Ocalanî ame akerdene. Polîsan bi manayê akerdişê fotografê Rayberê Şarê Kurdî Abdullah Ocalanî, hêrişê ciwanan kerd û tewr tay 5 kesî bi îşkence destbend kerdê.
