Hunermend Kadîr Çat seba doza Pinar Aydinlare ya 13ê Gulane rê veng da û va: “Hepisxane de bîyayîşê Pinar Aydinlare demokrasî û aştî rê darbeyêk o. Ewro Pinar Aydinlare eke teber de bibiyêne do aştî biqîrayne. No ser ma ganî hetê Pinar Aydinlare de bibê.”
Hunermend Pinar Aydinlare çarçiweya operasyonê HDK’î de amebî destbendkerdiş û peynî zî amebî hepskerdiş. Seba hetkarîya Pinar Aydinlare beyanatî yenê dayîş. Kadîr Çat zî hunermendo ke her tim hetê komelî de ca gêno, vera hepskerdişê Pinar Aydinlare ra bertek nîşan da.
Hunermend Kadîr Çatî ajansê PIRHA’yî rê qisey kerd.
Kadîr Çatî dîyar kerd ke Pinar Aydinlar tena bi nasnameyê xo yê hunermendîye nê, kesayîyêka roşnvîr û cinîyêk a û wina va: “Pinar Aydinlare rîyê Tirkîya yê roşnî ya û vengê şarî ya. Na pêvajo de hepskerdişê Pinar Aydinlare bêsamîmîyetîya îqtîdarî nîşan dana. Çi heyfo ke tena Pinar Aydinlare nê xeylî hunermendî nika hepisxaneyan de yê. Xeylî hunermendî nêçare welatê xo ra dûrî de cuyenî. Hunermend Axîn Biro û Nudem Durake zî nika hepisxaneyî de yê û rewşa înan a weşî zî rind nîya.”
Vengê roniştişê doza Aydinlare
Çatî bal ant serê awankerdişê HDK’î û wina domna: “HDK seba çareserîya problemanê Tirkîya rê ame awankerdiş û mîyanê ci de dorûverê demokratîkî, roşnvîrî, nuştoxî û temsîlkarê STK’î ca gênî. Hêrişê HDK’î armancê pergalî nîşan dano. Çi heyfo ke no welat de Yilmaz Guney, Ahmet Kaya, Nazim Hîkmet, Ahmet Arîf û ewro zî Pinar Aydinlare teda dî. Hepisxane de bîyayîşê Pinar Aydinlare demokrasî û aştî rê darbeyêk o. Ewro Pinar Aydinlare teber de bibiyêne do aştî biqîrayîne. No ser ma ganî hetê Pinar Aydinlare de bibime.”
