Endamê Komela Karkeranê Rîsaykilî ya Mendeyan Mustafa Ayî dîyar kerd ke ê do Qada 1ê Gulane de vajê ê wazenê bêrê naskerdene û vat: “Ma bi hezaran kesî yê û kûçeyan de yê. Wa ma nas bikero û bizano ke ma est ê.”
Tirkiya û Kurdîstan de rewşa xebatkar û kedkaran roje bi roje benê giranêr. Bi taybetî şert û mercê karî, girewtişê heqê keda xo û heqê bingeyin zafê reyan benê sebebê nêrazîbîyayîş û binpaykerdişê heqan. Karê tewr zor û problemin zî karê ravurnayîşê çopî yo. Stenbol de bi hezaran kesî bi nê karî debarê xo kenê. Karkerî bi erebeyanê çekçekî kûçeyanê Stenbolî de bi saetan gêrenê û kaxiz, plastîk û poşetanê ke ameyê eştiş, înan kom kenê. Zafê karkeran 10 saetan ra zêde xebitîyenê. Karkerê ke Stenbol de xebitîyenê, zafê şaristananê vakurê Kurdîstanî ra koçê Stenbolî kerdo û seba debara xo û keyeyê xo dest bi karê komkerdişê çopî kerdo. Karkeran seba ke heqanê xo bipawê Komela Karkeranê Rîsaykilî ya Mendeyan awan kerda. Endamê komele Mustafa Ayî derheqê karê xo û waştişanê xo yê 1ê Gulane de seba ajansê ma qisey kerd.
‘Karê ma zaf zehmet o’
Mustafa Ayî da zanayene ke o serra 2002yî de qezaya Sêwregi Riha ra koçê Stenbolî kerd û vat: “Embazê ma zî serranê 90î de koçê Stenbolî kerdo û dest bi karê raburnayîşê çopî kerd. Embazê ma zafane xo Amed, Sêwregi û Çewlîg ra yê. Karê ma zaf zehmet o. Kesê ke ameyê Stenbol, seba debara xo dest bi karê komkerdişê kaxiz û plastîkî kerd. Zafê ciwanî nê karî kenê û ê zî seba neçaryî kenê. Emrê ma koçberîye de derbaz beno. Ma zî waştêne welatê xo de xebitîyenê, labelê seba çinbîyayîşê karê ma koçê nê cayan kerd. Embazê ma seba debara keyeyanê xo nê cayan de bixebitîyê.”
‘Ma tewr kêm 12 saetan xebitîyenê’
Mustafa Ayî dewamê qiseykerdişê xo de da zanayene ke saeta karê komkerdişî çin a û va ke ê zafane serê sibayî dest bi karî kenê. Ayî dîyar kerd ke ê tewr kêm 12 saetan xebitîyenê û wina dewam kerd: “Na saete zaf reyan 12 saetan zî vîyarena. Qezaya Kadikoyî de embazê ma şewe xebitîyenê. Çunke uca de şewe kar zêdêr beno. Qezayanê Sultanbeylî û Umranîye de zî ma roje xebitîyenê. Cayanê bînan de beno ke embazê ma 17 saetan zî bixebitîyê, çunke nê karî de ti çend zêde çîyan kom bikî, hende zêde pere qezenc kenî. Embazê ma bi erebeyanê çekçekan bi saetan kuçeyanê şaristanî de gêrenê. Ma tewr zaf kaxiz, plastîk, asin, poşet û çîyê winasînî kom kenê.”
‘Ma wazenê bêrê naskerdene’
Mustafa Ayî dîyar kerd ke Komela Karkeranê Rîsaykilê Mendeyan do 1ê Gulane de seba heqanê xo qadan de bê û qiseykerdişê xo wina qedîna: “Ma 1ê Gulane rê vanê ‘Roşanê Karkeran’, labelê zafê embazê ma roja 1ê Gulane de zî xebitîyenê. Çend serrî yo ke ma sey komele tewrê 1ê Gulane benê. Ma do emser qadan de veng bidê û vajê ‘ma wazenê bêrê naskerdene.’ Ma bi hezaran kes ê û kûçeyan de yê. Her kes kûçeyan de ma vîneno. Labelê ma vanê ‘wa sîstem zî ma bivîno.’ Sîstem vera ma çimanê xo gêno. Labelê wa sîstem bizano ke ma est ê û ma kuçeyan de yê. Ma karêko zehmet kenê, zaf kesan zî karkerîya ma ra feyde vînenê. 1ê Gulane de ma do seba pêro karkeran qadan de bê û seba Gulîstan Doku û Rojîn Kabaîş edalet biwazê. Ma vera bêedaletîye vindenê.”
