Hemserekîya Konseya Rayraberdişî ya KCK’yî, serrgêra 27. ya komployê mîyanneteweyî de venga heme şarê kurdî û şaran da ke bi sloganê, “Rayber Apoyî rê azadîye, Rojava rê statu” wirzîyê lingan ser.
KCK’yî eşkerayîya xo de vat: “Ma serra 28. ya komployê mîyanneteweyî yê vera Rayber Apoyî de yê. 15ê sibate 1999î de esîrkerdişê Rayber Apoyî ra 27 serrî vîyartî. Ma heme dewlete û hêzanê sîyasîyan ke nê komployî de ca girewt, bi şîdet şermizar kenê û yewna rey zî îfade kenê ke heta ke Rayber Apoyî azad bibo do hemverê komployî de têkoşînê xo dewam bikero. Ma şehîdanê ‘Nêeşkenê Roşnîya Ma Tarî Bikerê’ ke pêşengê têkoşînê vera komployî bîyî, bi hurmet û şukranîye anê vîrî.”
Komployo mîyanneteweyî çira ame kerdene?
KCK’yî vat ke komplo hemverê projeya Rojhelatê Mîyanênî yê Demokratîkî ke Rayberê Şarê Kurdî Abdullah Ocalan bi bingeyê azadîya şarê kurdî û wayûbirayîya şaran waştêne bîyaro caardene de ame kerdene û wina vat: “Hêzê mîyanneteweyî û herêmî yê Rojhelatê Mîyanênî ke serdestîya vera kurdan û qirkerdişê înan de yo, viraştbî û dewamê feydeyanê xo Rojhelatê Mîyanênî de dîyêne. Rayberê Şarê Kurdî Abdullah Ocalan bi paradîgmaya xo ya wayûbirayîya şaran û çareserîya problemê kurdan, nizamê hemkarîye yê Rojhelatê Mîyanênî de waştêne biqedêno. Çunke çareserîya problemê kurdan do vernîya demokratîkbîyayîşê Rojhelatê Mîyanênî akero. Coka hêzanê mîyanneteweyîyan waşt ke Rayber Apo û PKK’yî tasfîye bikerê û na “tehluke” hewanê.”
KCK’yî vat ke Rayberê Şarê Kurdî Abdullah Ocalan bi komployêko ke tarîxî de bêemsal bî, 15ê sibata 1999î de ame esîrkerdene û hepisxaneyê Îmrali yê yewkesî de ame bicakerdene û wina domna: “La bi pêşengîya çalakîyanê “Nêeşkenê Roştîya Ma Tarî Bikerê”, şarê kurdî her ca de wirzîya lingan ser; Vakur, Başûr, Rojava û Rojhelatê Kurdîstanî de hemverê heme zordarîyan de xover da û Ewropa de zî her tim lingan ser o bi. Şarê kurdî ke çar parçeyan de Rayberê xo rê wina wayîr vejîyo, tarîxî de nimûneyêko bêemsal bî. Wezîra Karê Teberî ya Amerîka ya ê wextî Madeleine Albright zî vatbî “Ma nêpawitêne ke hende reaksîyon bivejîyo.”
‘Rayber Apoyî bi rayberê azadîya merdimîye û cinîyan’
KCK’yî vat ke Rayberê Şarê Kurdî Abdullah Ocalan şertanê esaretê Îmrali de nimûneyo tewr girs yê xoverdayîşî awan kerd û dîyar kerd ke 27 serrî xoverdayîşê hepisxaneyî hîna zêdeyêr bihêz bî, girs bî û bi rayberê azadîya heme merdimîye û cinîyan û wina vat: “Nê 27 serran de aqilê kurdî bi hewayêko çim-akerde viraşt û paradigmaya modernîteya demokratîke û xeta sosyalîzmê demokratîkî sey dîyarye pêşkêşê merdimîye kerd. Seserra 21. do bi îdeolojîya xilasbîyayîşê Rayberî merdimîye bireso demokrasîye û azadîye û têkoşînê azadîya cinîyan do rolo pêşeng bigîro xo ser.
‘Hêrişê Şêxmeqsûd û Eşrefîye bî komployê 2. yo mîyanneteweyî’
Ewro komplo newe ra ame kerdene û zaf cayan de pûç vejîya la hema bi pêroyî nêame binvistene. 5ê çeleyî 2026î de Peymana Parîsî ra dima, 6ê çeleyî de hêrişê ke taxanê kurdanê Helebî Şêxmeqsûd û Eşrefîye de ameyî kerdene, komployo 2. yê mîyanneteweyîye bî. Seke komployê 15ê sibata 1999î bi şexsê Rayber Apoyî hêrişê qirkerdişê kurdan bî, hêrişê 6ê çeleyî zî hemverê paradigmaya Rayber Apoyî de, sîstemê demokratîk û destkewteyan ser o ame kerdene. Eynî wext de prosesê haştîye û komelo demokratîk zî ame sabotekerdene. Sîstemo demokratîk ke bingeyê netewa demokratîke ser o Rojawan de seba heme Rojhelatê Mîyanênî modelêk bî, ame birnayene û hetê sînoranê Rojawanê Kurdîstanî ame antene.
‘Ma venga şarê xo danê ke wirzîyê lingan ser’
Şarê kurdî 9ê teşrîna verêne 1998î de senî ke hemverê komployî wirzîya ser lingan, ewro zî bi hişmendîya ke no komplo hêrişêkê estbîyayîş û cuya azad û demokratîk a kurdan ser o yo, her ca de wirzîyayo ser lingan. Wayîrvejîyayîşê Rojawanî eynî wext de wayîrvejîyayîşê paradigmaya Rayber Apoyî, cuya azade û destkewteyan o ke çar parçeyan de bi têkoşînê bi desan serran ameyî viraştene.”
KCK’yî peynîye de wina vat: “Serrgêra 27. ya komployê mîyanneteweyî de ma vengdanê qheme şarê xo û şaranê xo ke bi sloganê ‘Rayber Apoyî rê azadîye, Rojava rê statu’ wirzîyê lingan ser. Ma sozê xo tekrar kenê ke do têkoşînê xo yê hemverê komployî heta peynîye bidomnê û amancê xo yê azadîya Rayber Apoyî û Kurdîstanî bîyarê ca.”
