Keye û wesîyê Rayberê Şarê Kurdî Abdullah Ocalanî seba pêvînayîşî muracatê Serdozgerîya Komare ya Bursayî û Mudirîyetê Hepisxaneyê Îmraliyî kerd.
Qedexeyê pêvînayîşê keye û avûkatan ê Rayberê Şarê Kurdî Abdullah Ocalanî û girewteyanê bînan Omer Hayrî Konar, Hamîlî Yildirim û Veysî Aktaş ê ke Hepisxaneyê Tîpê F ê bi Ewlekarîya Berze de yenê girewtene, dewam keno. Birayê Abdullah Ocalanî Mehmet Ocalan û wesîyê ey Mazlum Dînç, waya Omer Hayrî Konarî Emîne Konar, birayê Hamîlî Yildirimî Polat Yildirim û waya Veysî Aktaşî Melîhe Çetîn bi waştişê pêvînayîşê muracatê Serdozgerîya Komare ya Bursayî û Mudirîyetê Hepisxaneyê Îmraliyî kerd. Eynê wextî de birayê Ergîn Atabeyî Erol Atabey, waya Zekî Bayhanî Şukran Bayhan û birayê Mahmut Yamalakî bi waştişê pêvînayîşî muracat kerd.
Astengkerdişê pêvînayîşan
Heqê pêvînayîşê keyeyan yê Abdullah Ocalan û 3 girewteyanê bînan ê ke Îmrali de yenê girewtene, bi manayê “cezayanê disîplînî” yeno astengkerdene. Mabênê serranê 2021 û 2024î de 8 reyan Abdullah Ocalan û girewteyanê bînan seba 3 aşman cezaya disîplînî ameye dayene û pêvînayîşê keyeyan reyde ameyê astengkerdene. Rixmê heme muracatan zî manayê cezayanê disîplînî û hûmarê dosyayan avûkatan reyde nêameyê parekerdene. Tewr peyên zî avûkatan teşrîna verêne de muracatê Dadgerîya Înfazî ya Bursayî kerd. Dadgerî dîyar kerd ke 16ê teşrîna verêne ya 2024î de “cezaya disîplînî” ya seba 3 aşman a newa Abdullah Ocalanî rê ameya dayene. Derheqê “ceza” de ke ameya dayene, tu agahî nêameyê dayene.
