KNK’yî eşkerayîye ke bi wesîleyê serrgêra rijîyayîşê Komara Kurdîstanî weşanaye, îfade kerd ke têkoşînê Qazî Mihemed û embazanê ey dewam keno.
Konseya Rayraberdişî ya Kongreya Neteweyî ya Kurdîstanî (KNK) bi wesîleyê serrgêra dardekerdişê Qazî Mihemed û embazanê ey eşkerayîya nuştekîye weşanaye. Eşkerayîye de bale ante muhîmîya tarîxîye ya Komarê Kurdîstanî ser o û îfade kerd ke têkoşînê azadîya şarê kurdî dewam keno.
Eşkerayîye de ame vîrardene ke 31ê Adare 1947î de badê rijîyayîşê Komara Kurdîstanî, Qazî Mihemed û Seyf Qazî û Sadr Qazî Meydanê Çarçirayê Mehabadî de ameyî dardekerdene. KNK’yî dîyar kerd ke bi pêroyî 28 rayberê komare ameyî dardekerdene.
KNK’yî vat ke Qazî Mihemed û embazanê ey seba azadî û xoserîya Kurdîstanî têkoşînêko muhîm da û awankerdişê komare seba şarê kurdî gamêka vurnayoxe ya tarîxîye bîye. Eşkerayîye de bale ante hemsenganê mîyanneteweyî yê ê demî ser o û vat ke bi encamê peymananê mabênê dewletan, bi taybetî bi nêzdîbîyayîşê Îngilîstan û Sovyetan ke tena feydeyanê xo esas girewtêne, dewleta Îranî reyde rejîmê Şahî Komara Kurdîstanî ya newîye ser o hêrîş kerd.
KNK’yî îfade kerd ke pratîkanê vera Qazî Mihemed û embazanê ey, nêzdîbîyayîşê hêzanê kolonîyalîstan ê vera kurdan eşkera kerd û problemê kurdan hema zî bêçareserî mendî û nê hêzî zî tîya de rolêko muhîm ê. Demê komare de komelê kurdî destkewteyê muhîmî yê warê rêxistinbîyayîş, kultur, huner, perwerde û ekonomî de girewtbî la bi piştîdayîşê hêzanê mîyanneteweyîyan û hêrişanê dewleta Îranî no proses qedîya.
KNK’yî sewbîna bale ante têkoşînî ser o ke ciwanê kurdî û cinîyê Îranî nika bi şîarê “Jin Jiyan Azadî” kenê û vat ke şarê kurdî vera dardekerdişan destbendkerdiş û zordarîyan reyde zî xeta Qazî Mihemedî de dewam keno. KNK’yî peynî de heme şehîdanê Kurdîstanî sere de Qazî Mihemed û embazê ey bi hurmet yad kerdî û hêrişê rejîmê Îranî û yê aktoranê bînan ê herême şermezar kerdî.
