Koçerê ke ziwatîye û krîzê ekonomîkî ra nêeşkenê heywananê xo ra fayde bigêrê înan va: “Ma nê karî ra fek vera bidê zî nêdê zî ma vêşan ê.’’
Germîya hewayî ra koçeranî verê xo da wareyanê Çewlîgî. Koçerê qezaya Qovancîyan a Xarpêtî her hamnanî verê xo danê wareyanê koyanê Çewlîgî, xeymanê xo akenê û wareyan de cabenê. Koçerî tenûr û ocaxanê xo waran de virazenê. Koçerîye de bara tewr girane milê cinîyan de ya. Cinîyî şefaqî ra wurzenê, heywanaê xo doşenê, nanî virazenê, kincan şonê.
Cuya koçerîye gulane ra heta êlule dewam kena
Koçeran ra Sema Polat ard ziwan ke wareyî çimeyê înan ê debare yê û vat: ‘’Zimistanan ma keye de yê, hamnanan vejîyenê waran. Verê cû heywanê ma bi payan ameyêne la nika qedexeyê dewlete ra ma heywananê xo bi wesayîtan anê û benê. Nêmeyê pereyê ma şibo benzînî. Ma saete pancî de wurzenê we. Her gure milê cinîyan ser o. Ceyran çin o, rayîrî çin ê. Heywanê ma kêmîyayî, mesrafî zî zêdîyayî coka ameye qîmê ma nêkeno. Yew qîmetê koçerîye nêmeno.’’
Koçberan ra Muhtebere Uçuk bale ante ziwatîya wareyan ser û vat: ‘’Seba ke varan nêvareno vaş zî çin o. Vaşê heywanan vay o. Ma nêeşkenê bi heywankarîye debara xo bikerê. Ma biwazê karêkê bînî bikerê zî şensê ma yê debare çin o. Ma hîrê mengan koyan de yê, hîrê mengan deştan de yê. Qezençê ma, ma rê nêvejîyeno. Ma nêeşkenê heqê destê xo bigêrê. Ma destek zî nêvînenê. Bi her hawayî ma vêşan manenê.’’
