Endamê Komîsyonî yê CHP’yî Sezgîn Tanrikuluyî dîyar kerd ke meseleya kurdan tarîxîya û ganî kesê ke mexdûr bîyê Meclîs de bêrê goşdarîkerdene.
Komîsyonê Demokrasî, Wayûbiratîye û Paştdayîşê Milîyî vizêr kombîyayîşê xo yo hîrêyin kerd.
Wekîlê Partîya DEVA û endamê komîsyonî Mehmet Emîn Ekmenî kombîyayîş de qisey kerd. Ekmenî bale ante ser ke pêro endamê komîsyonî rixmê cîyatîya fikranê xo ameyê pêser û vat ganî sereraştkerdişê qanûnî bêrê kerdene. Ekmenî waşt ke wa îqtîdar astengîyanê verê prosesî wedarno û karan asan bikero.
Endamê Komîsyonî yê CHP’yî Sezgîn Tanrikuluyî ard ziwan ke seba ke mesele biba komelkî ganî Meclîs nîqaşan bero verê komîsyonî û vat, “Meseleya kurdan tarîxî ya û ganî kesê ke mexdûr bîyê Meclîs de bêrê goşdarîkerdene.” Tanrikuluyî vat gerek keyeyê Ugur Kaymaz, Ceylan Onkol, Eren Bulbul û Mayê Şemeyî wa bêrê goşdarîkerdene.
Qiseykerdişan ra dima kombîyayîş qedîya. Kombîyayîşo bîn 19-20ê tebaxe de yo.
Wina pawîyeno ke komîsyon 19-20ê tebaxe de Mayanê Haştîye, temsîlkaranê MEBYA-DERî, komeleyanê keyeyanê polîs û leşkeran û Wekîla Keyeyan û Xizmetanê Komelkîyan goşdarî bikero.
