Dima ke dîmenê cerdevananê ke Qileban de vera cinîyêk şîdet mojnenê, reaksîyonê her ke şonê zêde benê. Komela Cinîyan a Star eşkera kerd ke ê şîdetê vera cinîyan û no zîhnîyeto ke sucdaran paweno bi tu hawayî qebul nêkenî.
Merkezê qezaya Qileban a Şirnexî de nê dîmenan de aseno ke cerdevano verên Abdullah Alturk û cerdevan Cevat Rustemoglu 2 cinîyan rê şîdet keno. Dimayê na hedîse, nê cerdevanê ke şîdet kerd ameyê girewtene labelê dima ameyê veradayene. Na babete ser o Komela Cinîyan a Star eşkerayîyêka fermî daye û seba adalet û muhakemekerdişî veng da.
‘Ma her tim kîşta cinîyan de bibê ke rastê şîdetî ameyê’
Eşkerayîya nuştekî de ame dîyarkerdiş ke hêrişê vera her di cinîyan nêno qebulkerdene û wina dewam kerd: “Kesê ke amebî girewtiş dima ameyê veradayîş. Eynê wextî de çinbîyayîşê tehqîqatêko tesîrdar rayîrî vernîya şîdetî akeno. Nêno qebulkerdene ke kesê ke şîdet kenî bêrê pawitiş. Sey Komela Cinîyan, ma raya pêroyî rê eşkera kenî ke ma her tim kîşta nê cinîyan de yî ke rastê şîdetî ameyê. Ma do na hedîse taqîb bikerê û têkoşînê xo yê seba edaletêka tesîrdar vera berpirsiyaran bidomnê. Ma şîdetê vera cinîyan û no zîhnîyeto ke sucdaran paweno qebul nêkenî.”
‘Gureyê polîs û hukmî pawitişê heqê ciwîyayîşî yo’
Eşkerayî de ame dîyarekerdene ke gureyê artêş, polîs, rayedaranê îdarî û hukmî pawitişê sucdaran nîyo, pawitişê heqê ciwîyayîşî yê cinîyan o. Eşkerayî wina dewam kerd: “Îdiayê ke vanî rayedaranê îdarî veradayîşê nê sucdaran ser o mudaxaleyê hukmî kerdo, ganî ê zî bêrê zelalkerdene. Ganî dezgehê têkîldarî bilez eşkerayîyêka zelale nê îdiayan ser o bîdî. Poltîkaya bêcezaverdayîşî ya ke bi serran o yena rayraberdene sebebanê tewr pîl ê şîdetê vera cinîyan ra yew a ke bi nê hawayî bêşerm eşkeno bêro kerdene. Nêno qebulkerdene ke camêrdê ke şîdet kenî bêrê pawitene û cinî tena bêrê verdayene.”
Komela Cinîyan a Star peynîya eşkerayîya xo de vast ke ê ne şîdetê vera cinîyan û ne zî zîhnîyetê ke sucdaran paweno, qebul nêkenî.
