Komxebata “Stratejî û Polîtîkayanê Têkoşînê Seba Ziwanê Kurdkî” roja dîyine de domyena. Roniştişê pancîne de “Têkoşînê Seba Ziwanê Kurdkî Têkilîya Cugeh, Perwerde û Qadê Bîn ê Kedî” ame nîqaşkerdene.
Komxebata “Stratejî û Polîtayanê Têkoşînê Seba Ziwanê Kurdkî” ke hetê Sazîyê Ziwanê Kurdkî û Platformê Sazîyê Demokratîkan ra Wanî de yeno viraştiş, roja dîyine de domyena. Roniştişê pancine de Abbas Bîngol, Lokman Babat, Muhyettîn Aksîn, Hasan Erzî, Esma Gumuş babeta Têkoşînê Seba Ziwanê Kurdkî Têkilîya Cugeh, Perwerde û Qadê Bîn ê Kedî” pêşkêş kerd.
Endamê Egîtîm Senî Lokman Babat ard ziwan ke kurdan seba heq, kultur û ziwanê xo xoverdayîşêko gird dayo û da zanayîş ke serrê 90î de zî dewanê kurdan ameyê vilakerdene û wina va: “Ma ziwanê xo vîra kerd û ma textêko biqimet seba tirkî viraşt la bi seya herekete û qehremanê xo ma hîşyar bîyê û hewna ziwanê xo rê wayîr vejyayî. Ziwanê domanan ziwanê ameyoxî yo. Wa dewlet senî xizmetê tirkî kena, wina xizmetê kurdkî zî bikero.”
‘Wa ziwanê weşî û xizmetî bibo kurdkî’
Bi ser nameyê warê weşîye Abbas Bîngol heqê qiseykerdene girewt û da zanayîş ke ziwan seba komelê kultur, huner û estbîyayîşî yo û wina domna: “Pergal, cuya goreyê menfaetê xo her çik organîze keno û wazeno kurdan bihelîno. Tarîxê merdimeyîye de weşî cayêko xususî gêno. No ser ganî ziwanê kurdkî zî bibo ziwanê fermî û perwerdeyî. Her wina wa ferhengê termînolojîya weşîye bêro vetine.”
‘Pawitişê ziwanî pawitişê xozaye yo’
Aktîvîstê Cugehî Muhyettîn Aksîn zî ard ziwan ke cuyeya merdiman bi xoza ra girêdayî ya û destnîşan kerd ke no ser eke komelêko xocayî nêbo nêeşkeno ziwanê xo bipawo û wina domna: “Polîtîkayê serdestê ma, ma dewan ra vejînayî û xoza ra dûr vistî. Bi des hezaran qehramanî canê xo dayî seba ke ma biciwî, wa ma bes qisey bikerî.”
‘Koçberîye ziwanê ma helîna yo’
Bi ser nameyê warê koçberîye Hasan Erzî bal ant ser polîtîkayê koçberîye û destnîşan kerd ke kurdan koçî ke cayê ke kerdî, bîyê aîdê nê neteweyan û wina qedîna: “Wa her kurdêk verê xo bido Kurdistanî, lazim o ma bikewê mîyanê têgêrayîşî ke ciwanê ma nêşîrî dîasporayî.”
Komxebat, bi beşê pers û cewaban domyeno.
