Dîwanê Hemserekîya KONGRA-GEL’î, bi mûnasebetê serrgêra komployê 15ê sibate seba azadîya Rayberê Şarê Kurdî Abdullah Ocalanî û statûyê Rojava 14ê sibate de Strasbourg de rayîrşîyayîş û mîtîng do bibo, veng da ke beşdarîyêka bihêze biba.
KONGRA-GEL’î eşkerayîya xo de wina vat: “Serrgêra 27. ya komployê mîyanneteweyî de wazenê gonîya şarê Rojava ser o komployo newe bikerê. Wazenê sîstemê komelê demokratîkî ke Rojava de bi pêşengîya cinîyan seba şaran û bawerîyan ameyo viraştene, hewanê û bi şeranê mezheb û nasyonalîzmî şaranê Rojhelatê Mîyanênî rê cehenemî bidê ciwîyayene.”
KONGRA-GEL’î vat ke bi xoverdayîşo tarîxî yê şarî û mudaxeleyê Rayberê Şarê Kurdî Abdullah Ocalanî tehdîdê ke hemverê destkewteyanê heme kurdan de ameybî plankerdene, vindertî la rîsk dewam keno. Xoverdayîş û tewrê yewîya neteweyî zelal nîşan da ke êdî Rojhelatê Mîyanênî de dîzaynêko bêkurdan mumkun nîyo.
KONGRA-GEL’î vat ke ganî seba ke firsendo tarîxî ke Rayberê Şarê Kurdî Abdullah Ocalanî seba aştî û demokrasî viraşto, heba nêbo şertê xebitîyayîşê azadî bêrê viraştene û Rayberê Şarê Kurdî Abdullah Ocalan bi hewayêko fîzîkî azad bibo. Sewbîna statûyê Rojava ganî binê garantîya qanûnî de bibo. Berpirsîyarîya rasteraste ya Amerîka û YE’yî est a.
KONGRA-GEL’î vengda şarê kurdî û dostanê ci: “14ê sibate de Strasbourg de bi sloganê ‘Rayberê Apo rê azadî, Rojava rê statû’ rayîrşîyayîş û mîtîng est ê. Ma vengdanê şarê xo û dostanê xo ke bi hêz beşdar bibê.”
