Hemsereka Meclîsê Şarî yê Mexmûrî Fîlîz Budak îfade kerd ke qerarê Kongreya PKK’yî cuya komelê demokratîkî û aştîyaneyî îfade kenê û vat ke ê do goreyê qeraranê Rayberê Şarê Kurdî û Têgêrayîşê Azadîye têbigêrê.
Hemsereka Meclîsê Şarî yê Mexmûrî Fîlîz Budak derheqê qeraranê Kongreya 12. ya PKK’yî, şehadetanê Alî Haydar Kaytan û Riza Altun û çarenusê Kampa Multecîyan a Şehîd Rûstem Cûdîyî de ajansê ANF’yî rê qisey kerd.
Fîlîz Budak Kaytan û Altun yad kerd û vat: “Şehadetê nê her di serkêşan ma dejnayî. Înan verê ma roşnî kerd. Her diyî zî embazê Rayber Apoyî yê verênî bîyî. Embaz Alî Haydar Kaytan û Riza Altunî nasnameyê kurdanê azadan afirna. Ma mînetdarê înan ê. Ganî ma layîqê înan bibê.”
Fîlîz bale ant Kongreya PKK’yî ser û vat: “Pêro qerarê na kongre tarîxî yê. Qerar û erjnayîşê Kongreya 12. manîfesto yê û do verê komelê demokratîke û aştî akerê. PKK’yî şarê kurdî îmha ra xelisna û qerar da ke êdî rolê ci têkoşînê çekdarî de qedîyayo. Ma bi Rayber Apo û rêxistinê xo bawer ê û ma do heta peynî gamanê înan taqîb bikerê.”
Fîlîz îfade kerd ke qerarê kongre do tesîrê Kampa Mexmûrî bikerê û vat: “Şarê Mexmûrî serranê newayan de zilmê dewleta tirke ra koç kerd. 30 serrî yo no şar xover dano. Tewirê şarê Mexmûrî tewirêko polîtîk o. Eke agêrayîş do bêro kerdene, şertê şarî est ê. Ewil ganî Rayber Apo azad bibo, ganî dewlete hesab bida û aramîye bîyara ca. Verê ma de prosesêk est o û ma ney teqîb kenê. Ma do goreyê qeraranê Rayber Apoyî û Têgêrayîşê Azadîye têbigêrê.”
