Platformê Sazgehanê Demokratîk derheqê hêrişanê vera Rojava de bi tewrbîyayîşê bi hezaran kesan rayîrşîyayîşêk organîze kerd. Hemverfeka Înîsîyatîfê Demokratîkî Gulcan Kaçmaz Sayyîgît eşkerayî de qisey kerd û wina va: “Ma kurd ê; çi Rojhelat, çi Vakur, çi Başûr û çi Rojava. Ma do nêverdê ke zîhnîyetê DAIŞ’î û paştîgirê ê çeteyan estbîyayîşê şarê kurdî çin bikerê.”
Bi pêşengîya Platformê Sazgehanê Demokratîk, Wan de derheqê hêrişanê vera Rojava de bi tewrbîyayîşê hezaran kesan rayîrşîyayîşêk ame viraştene. Girse, Parka Kurtuluşî de kom bi û heta Beşyolê qezaya Rêya Armûşî rayra şi.
Rayîrşîyayîşî de pankarto ke ser o “Xwedîderketina Rojava xwedîderketina mirovahiyê ye”, “Rojava xeta me ya sor e”, “Em rê nadin pergala dagirker” û “Li ser şopa Denîzan, îmana me berxwedan” ameyêne nuştene, amaeyê akerdiş. Reyna dowîzê ke ser de “Dawî çi dibe bila bibe dê bêhempa be”, “Rojava ne tenê ye” û “Ji Qelqeliyê heta Rojava wê berxwedan bi ser bikeve” nusîyayîbî, ameyî berzkerdiş. Girse sloganê sey, “Bijî berxwedana Rojava”, “Bijî Serok Apo”, “Kujer HTŞ”, “Wê Rojava ji bo DAIŞê bibe goristan” û “Rojava Rojhilat e, Kurdistan yek welat e” vatê. Endam û rayberê partîyanê sîyasî, temsîlkarê sazgehanê sivîl û xeylê welatijî zî tewrê rayîrşîyayîşî bîyî.
‘Ewro roja yewîye ya’
Welatijan paceyanê xo ra û erebeyan zî bi kornayan paştî daye rayîrşîyayîşî. Xeylê welatijî zî rayîr de tewrê rayîrşîyayîşî bîyî û nêrazîbîyayîşê xo yê vera hêrişan îfade kerdê. Girse, Beşyol de eşkerayîyêk daye. Hemverfeka Înîsîyatîfê Demokratîkî Gulcan Kaçmaz Sayyîgît eşkerayî de qisey kerd û dîyar kerd ke Rojava bi xoverdayîşê xo nameyê xo bi tîpanê zernênan tarîx de nuşto.
Gulcan Kaçmaz Sayyîgît vat ke her dîn û bawerî eşkenê pîya biciwîyê û wina vat: “La zîhnîyetê DAIŞ’î serê yew dîn û yew ale de têgêreno. Wexto ke vera Şêxmeqsûdî hêriş virazîya, no hêriş tena vera taxêk nêbi, vera heme şaran bi, vera şarê kurdî bi. Ma zanê kam paştî dano nê zîhnîyetî. Dewleta tirkan paştî dana nê zîhnîyetê û netewe-dewletî paştî danê nê çeteyan. Ma kurd ê; çi Rojhelat, çi Vakur, çi Başûr û çi Rojava, ma do nêverdê ke zîhnîyetê DAIŞî û terefgirê înan, çeteyî estbîyayîşê şarê kurdî çin bikerê. Ewro roja yewîya şarê kurdî ya. Wa kurdê welatperwerî, kurdê bişeref û birûmetî wayîrê destkewteyanê xo vejîyê. Ma do têkilîyanê xo yê dîplomatîkan zî xurt bikerê. Vengê ma seba heme dewletanê dinya yo; wa paştî nêdê zîhnîyetê DAIŞî, wa paştî bidê şaran. Ma kurd ê, ma Kurdîstanij ê. Ma do her tim paştî bidê way û birayanê xo.”
Çalakî bi çepik û sloganan qedîyaye.
