Perwerdekaranê Ma Musicî ra Ferhat Ertaş seba serrgêra 9. yê ronayena Ma Musicî ser o wina vat: Ma Music tena kursê muzîkî nîyo; na akademîyêka, konservatuvarêk û merkezê fikirîyayîşî yo.”
Akademîya Ma Musicê ke badê girewtişê Konservatuvarê Aram Tîgran 3ê adare 2017 de Amed de bi sloganê “seba her kesî muzîk, her ca de muzîk” startê xebatanê xo da, bi projeyanê newe yê derheqê muzîkî de xebatanê xo domneno. Akademîya ke bi Orkestraya Ahengê Xozayî yê Ma’yî, Orkestraya Gedeyan ê Ma’yî, Orkestraya Cinîyan ê Ma’yî û Orkestra Ma’yî seba muzîkê tradîsyon yê kurdî morê xo da xebatanê serkewteyan ro. Ma Music ke bi sloganê “Ma do gedeyanê nê welatî bê muzîk nêverdê.” Ame awankerdene û şûbeyê xo yê Zarok Ma û Çand Ma, Stenbol de zî Egîdê Cimo Ma akerd. Ma Music ke kitabê sey “Repertuarê Stranbêjiye”, “Hînkerê Zerb û Rîtmên Kurdkî”, “Metodê Kemanî” û “Lorikan ra ver bi senfonîya raywanîya neweyan” ke seba keman û pîyanoyê metodê kurdî tede est ê çap kerdê û bi Gerok Ma’yî xo resna bi hezaran gedeyan. Ma Music 8 serrî pey xo de verdayê do ewro seba serrgêra ronayena xo yê 9. Saete 20:00 de Çand Amed de programê pîrozkerdişî virazo.
Perwerdekaranê Ma Musicî ra Ferhat Ertaş o ke zêdetirê des serrî yo mîyanê xebatanê kultur û hunerî de ca gêno derheqê xebat û serrgêrê ronayena Ma Musicî de ajansê ma rê qisey kerd.
‘Xebata bingeyine arşîvkerdiş û qeydkerdiş o’
Ferhat Ertaş destpêkê qiseyê xo de bale ante serê bingeyê xebatanê Ma Musicî û dîyar kerd ke ey hewl danê ke karê xo bi hewayêko akademîk bikerê û vat: “Deşîfrekerdiş ra bigîre heta notayan, qeydkerdiş û komkerkerdişê berheman; ma xebatêke bingeyin ê qeydkerdiş û arşîvkerdişî kenê. Pawitena mîrasê kulturî de bikarardişê metodanê rast û zanistî seba ma wayîrê muhîmîyêka cuye ya.”
‘Ganî vera qirkerdişê kulturî de warê perwerdeyê gedeyan veng nêro verdene’
Ferhat Ertaş dîyar kerd ke ganî vera qirkerdişê kulturî û asîmîlasyonî, warê pewerdeyê gedeyan veng nêro verdene û wina domna: “Amancê ma yê sereke no bî ke ma xo biresnê gedeyanê nê welatî yê ke binê talûkeyê qirkerdişê kulturî de yê. Seba naye zî lazimatîya ma bi metodanê dinya estbî. Ma nê metodî açarnayê kurdkî, entegreyê sîstemê xo kerd û mufredatêke viraşt. Zarok Ma bi kay, rîtm û naskerdişê dengbêjan, perwerdeyê gedeyanê 0-5 serre bi hewayêko komî û bi deyîranê kurdkî xebitîyeno.”
Bi rayîrê Gerok Ma’yî ma xo resna xêylê welatan’
Ferhat Ertaş qalê projeyê “Gerok Ma” kerd û ard ziwan ke ey bi na projeyî sînoran derbas kenê û wina vat: “Bi rayîrê Gerok Ma’yî ma xo resna xeylê cayan. Amed ra heta Stenbol û Mêrdîn, Mexmûr ra heta Silêmanî û teberî welatî heta Almanya, Fransa û Japonya. Kamca de gedeyê kurdan estbê ma hewl danê ma şorê uca; semedêko ma vînenê qirkerdişê kulturî her ca de dewam keno.”
‘Ma Muzîk pirdêko mabênê vîyarte û ameyoxî de yo’
Ferhat Ertaş peynî qiseyê xo de ard ziwan ke Ma Muzîk xo sey pirdêke mabênê viyarte û ameyoxî de pênase keno, no têkoşînê înan netîceyê kedêka komkarîyo û wina vat: “Na sazgehe destpêke de bi paştîdayene sazgehanê mîyanneteweyî, la bi giranî bi paştîdayene şarî, mamosta û kedkaranê şaristanî ameya ronayene. Lazimo ke ma seba ameyoxî kadroyanê neweyan perwerde bikerê ke bieşkê nê warî pir bikerê û temsîlîyetê kulturê kurdî bikerê. Ma Muzîk tena kursê muzîkî nîyo, na akademîyêk, konservatuvarek û merkezêk fikirîyayîşî yo.
