Akademîya Ma Musîcî do siba “Rojanê Ma Musîcî” yê 7. organîze bikera. Koordînatorê Ma Musîcî Şêrko Kanîwar da zanayene ke do Rojanê Ma Musîcî seba vîrardişê Nesrîn Şêrwan bikerê û vengdayîşê tewrbîyayîşî kerd.
Konservatuarê Aram Tîgranî serra 2010î de binê banê Şaredarîya Amedî ya Şaristanê Girdî de amebi ronayene. Dima ke qeyûm teşrîna peyêne ya 2016î de tayînê şaredarî ame kerdene, koservatuar bi destê qeyûmî ame girewtene. Girewtişê konservatuarî ra pey muzîkjen û xebatkarê ey bêkar mendê. Muzîkjen û mamosteyê ucayî wextêk ra pey 4ê adara 2017î de bi sloganî “Ma gedeyanê nê welatî bêmuzîk nêverdanê” Akademîya Ma Musîc Centerî rona. Akademî bi sloganî “Seba her kesî muzîk û her ca de muzîk” rayîr kewt, mîyanê 8 serran de Grûba JinMa, Koroyê Gedeyan, Orkestraya Ma, Orkestraya Rîtmanê Xozayîyan, Zarok Ma, Akademîya Dengbêjî û Çand Ma’yî awan kerd.
Akademiya Ma Musîcê do “Rojanê Ma Musîcî yê 7.” Mabênê 12 û 15ê hezîrane de organîze bikera. Aktîvîteyê emserrî do seba vîrardişê hunermend Nesrîn Şêrwan bêrê kerdene. Do mabênê 12ê hezîrane de saete 18:00î de baxçeyê Ma Musîcî de Dîwanê Wendekaran de bêro kerdene. 13ê hezîrane de Çand Ma de do defjen, senturjen û pîyanojenî bi Dîwanê Wendekaran asta ke resayî, pêşkêş bikerê. 14ê hezîrane de baxçeyê Zarok Ma ke gedeyî ke serrêk perwerdeyî vînenê, do deyîrî ke serrêk de bander bîyî, bi nameyê Dîwanê Zarok Ma’yî û endamê Koma Ma’yî û Gedeyê Ma’yî do tedeyîyanê Repertuara Stranbêjîyî ra pîya konser bidê.
Koordînatorê Akademiya Ma Musîcî Şêrko Kanîwar derheqê Rojanê Ma Mûsîcî de ajansê ma rê qisey kerd.
Do Rojanê Ma Musîcî û serrgêrî bikî yew
Şêrko Kanîwar dîyar kerd ke roja ke Ma Musîc awan bîya heta ewro hewl danê ke her serre bi nameyê “Rojê Ma Musîcî” çalakîyan bikerê û wina vat: “Demo ke ma reya ewil “Rojê Ma Musîcî” organîze kerdê ma vat îtîya de perwerdeyêk yeno dayene. Gede yî, ciwan î, ganî ma perwerdeyî pêşkêşê keyeyanê xo bikerê. Seba ke averşîyayîşê xo bivînî û keyeyê înan hîna zaf wayîrê na xebate vejîyê. Gede û keyeyanê neweyan teşwîq bikerê. No yo emserr ma yê hewtine organîze kenê. Xebatanê mîyanê Ma’yî ra vete ma rey rey mêymanan zî tewrê Rojanê Ma Musîcî kenê. Ameyoxî de planêkê ma est o ke ma Rojanê Ma Musîcî û serrgêre bikî yew û bi nameyêko bîn xebate bidomnê.”
‘Amancê ma o yo ke ma hunermendan bidî şinasnayene’
Şêrko Kanîwar da zanayene ke par qerar girewto ke her serre bi nameyê hunermendêko/a kurd “Rojanê Ma Musîcî” organîze bikerê û wina va: “Ge ge riyê şertan û rojevê şaristanî ra merdim nêeşkeno tarîxo rastîn ê hunermendan de înan bîyaro xo vîr. Ma Rojanê Ma Musîcî yê 6. de bi nameyê Rênçber Ezîzî ke pêşenganê muzîkê zazakî ra yo yew o, organîze kerd. Ma vat wa emserr zî hunermendêka bîne ba. Emserr do Rojê Ma Musîcî seba vîrardişê Nesrîn Şêrwan do bêrê kerdene. Amancê ma o yo ke ma hunermendanê kurdan bidî şinasnayene.”
Vengdayîşê beşdarbîyayîşê Rojanê Ma Musîcî
Şêrko Kanîwar peynîya qiseykerdişê xo de wina vengda: “Kerem bikerê bêrê, bi rayîrê çalakîyanê winasînan, ma pîya çimanê yewbînan ra biewnê, wa vengê bireso yewbînan û ma pîya deyîran vajî. Eke şima firsend dî, bêrê beşdarê Rojanê Ma Musîcî bibê, ma pîya rojêka ke pirê deyîranê Kurdkîyan a, pîroz bikerê.”
