Komela Verê Heme Çî Gedeyî do 26, 27 û 28ê êlule de Amed de Festîvala Gedeyan a Nêmkulturî organîze bikera. Xebatkara komele Şîrîn Saglam wina veng da şarê Amedî: “Seba ke şar wayîrê kultur, ziwan û nasnameyê xo vejîyo, ma wazenê beşdarê festîvale bibê.”
Komela Verê Heme Çî Gedeyî çarçewaya projeyê “Bi Rayîrê Hunerî Xurtkerdişê Kapasîteya Heqanê Cinî û Gedeyan” de ke bi hemkarîya Ajansê Piştgirîya Averşîyayîşê Katalanan rayra bena, Festîvala Nêmkulturî ya Gedeyan organîze kena.
Festîvala Gedeyan a Nêmkulturî de berhemê atolyeyanê kultur, huner û afernayoxî yê ke nêzdîyê şeş aşmî yo dewam kenê, do bêrê mojnayene. Festîvale do 26, 27 û 28ê êlule de Amed de bêra kerdene. Festîvale de tena berhemê gedeyan nê do piştgirîya sazgehanê sîvîl û hunermendanê mîyanneteweyî mêmanperwerîya berhemanê nêmkulturî zî bêra kerdene.
Festîvale de atolyeyê fotograf, karîkatur, tîyatro, muzîk û rîsaykilî û tayê performansê sehneyî, muzîkjenê katalan ê partnerê projeyî do konseranê soloyan bidê û gedeyan reyde atolyeyan bikerê. Na festîvala ke bi piştgirîya Şaredarîya Amedî ya Şaristanê Girdî ra yena kerdene, amanc kena ke kulturê xebata pîya ya rayberanê herêmî û sazgehanê komelê sîvîlî ya seba gedeyan xurt bikero.
Xerbatkara Komeleya Verê Heme Çî Gedeyî Şîrîn Saglam derheqê festîvale de ajansê ma rê qisey kerd.
Viraştişê atolyeyan
Şîrîn Saglam da zanayene ke nêzdîyê şeş aşmî yo amadekarîya na festîvale kenê û vat: “Atolyeyê ma est bîyê bi hemkaranê ma yê Zarok Tv, Ma Musîc û Şanoyê Şaristanî yê Amedî reyde. Zarok TV de atolyeyê ma yê afernayoxî est bîyê, sey atolyeyanê fotografi karîkatur. Ma Musîcî reyde zî atolyeyê ma yê deyîrbazî, sêtêl û rîtmê xozayî bîyê. Bi saya Şanoyê Şaristanî yê Amedî zî ma ciwanan reyde di atolyeyî viraştê. Atolyeya kayanê muzîkî û tîyatroyî viraştê.”
‘Amanc o yo ke şertanê gedeyan baş bikerê’
Şîrîn Saglam derheqê amancê festîvale de wina vat: “Amancê festîvala ma o yo ke ma xo biresnê gedeyanê ke şer ra remayê, koçber û bi taybetî zî yê qezaya Sûr ê Amedî û tay bo zî şert û mercanê înan ê cuye hîna baş bikerê. Nika atolyeyê ma qedîyayê, amadekarîyê festîvale dewam kenê.”
‘Projeyê ma yê seba gedeyan dewam bikerê’
Şîrîn Saglam îfade kerd ke sey Komela Verê Heme Çî Gedeyî projeyê înan ê seba gedeyan dewam kenê û wina vat: “Bi taybetî projeyê ma yê seba ziwanî est ê. Festîvale ra pey zî ma do gedeyanê ciwanan reyde bi lehçeya Kurdkî kurmancî dublaj û anîmasyon virazê. Nê perwerdeyan ra pey do Zarok TV ke hemkarê ma yê, perwerdeyanê xo bidomnê.”
‘Seba wayîrvejîyayîşî kultur û nasnameyê xo beşdar bibê’
Şîrîn Saglam behsê tedeyîyanê festîvale kerd û tewr peyên veng da şarê Amedî: “Bi taybetî cinî û gedeyî, ma veng danê şarê Amedî kenê ke bêrê beşdarê festîvale bibê û beşdarê festîvale bibê. Seba ke wayîrê ziwanê xo û nasnameyê xo vejîyê, ma wazenê beşdarê festîvale bibê. Festîval seba gandarkerdişê nê çîyan muhîm a. Kerem bikerê ma do bi beşdarîya şima gelekî keyfweş bibê.”
Programê Festîvale wina yo:
26ê Êlule – Çand Amed (Merkezê Kultur û Kongreyî yê Şaredarîya Amedî ya Şaristanê Girdî)
*17.30 – Qiseykerdişê Destpêkî yê Protokolî
*Sînevîzyon – Stop motion
*Komela Hêvîyanê Renginan – Koroyê Gedeyan ê Rengin
*Ma Music– Koma Deyîrbazî/Rîtm/Ksîlofon-Boomwhackers, Koma Sêtêljenan
*Muzîkjenên Katalan -Performansê Muzîkî Yê Solo
27ê Êlule
Saete: 12:00- 17:00 Sumerpark
*Ma Music – Gerok Ma
*Rengareng- Atoleyaya Viraştişê Xapan
*Zarok TV – Nawitgehê resim û karîkaturan & Kargeha Karîkaturan
*Yasemîn (Komela Verê Heme Çî Gedeyî) – Atolyeya Kûklayan
*Mordem Huner – Atoleyay Kûklayan
*Kased Atoleyay Rîsaykilê
*Mordem Huner -Jonglor
*Weqfa Koçî – Viraştişê Kolyeyanê Darinan
*ÇIAD (Komela Dadwerîya seba Gedeyan) – Atolyeya Resayîşê Heqan
*Muzîkjenê Katalanî – Atolyeya Muzîkî
Ca: Çand Amed
Saete: 18:00
Şanoyê Şaristanî yê Amedî – Bijîşkê min yê Xoşewîst
28ê Êlule
Ca: Çand Amed
Saete: 13:00
-Şanoyê Şaristanî yê Amedî – Keçelok
Saete: 18:00
-Şubadap – Şanoyê Hîkayeyan ê Moyo
-Şubadap – Performansê Pandomîmî yê Îlker Kiliçerî
-Şubadap – Konser
