Dadgerê Mehkemaya Îdarîye ya Berze Ahmet Hamîdî ke seba roşanî şibi Mardîn, bi birîndarî ame vînayene.
Ahmet Hamîdî ke Mehkemaya Îdarîye ya Berze de dadgerê cigêrayîşî yo, seba roşanê şibi Mardîn û hotelêk de mendêne. Hotêlo de ke Hamîdî tede mendêne, vengê çekan ame û nê vengî ser o xebatlarê hotelî şîyî odeya ke Hamîdî mendêne. Xebatkarî ke Hamîdî ode de bi hewayêko birîndar dî, agahî daye grûbanê weşîye. Hamîdî mudaxaleya ewilîne ra pey hewanîya Nêweşxaneyê Perwerdeyî û Cigêrayîşî yê Mardînî û uca de ame dermankerdene.
Dima Hamîdî bi ambûlansî nêweşxaneyêko taybet ê Dîlokî rê ame sewqkerdene. Ame zanayene ke cuya Hamîdî ser o tehlukeya weşîye dewam kena. Avûkatê Baroyê Batmanî Rostem Sîyahtaş hesabê xo yê Xî ser o derheqê babete de mesajêk pare kerd û vat: “Ma rê agahî ameye ke hedîse întîhar o. Ey rê hêriş nêameyo kerdene.”
Ame dîyarkerdene ke Hamîdî 42 serrî yo, zewijnaye yo û pîyê 3 gedeyan o û seba roşanê Anqara ra şîyo Batman û uca ra vîyarto Mardîn.
Derheqê hedîse de cipersayîş ame destpêkerdene.
