Serekê Pêroyî yê HSD’yî Mazlum Ebdî kesê ke 2004î de Serewedartişê Qamişloyî de ameyî kiştene eyî yad kerdî.
Şaristanê Qamişloyî 12ê adara 2004î de teverkewtişê futbolî de çire vejîyabî. Dima ra çire vurîya, bî serewedartişê şarê Qamişlo. Şarê Qamişlo vera neheqîye û kiştena mordeman sere wedarit û her ca kerdbî cayê xopawitişî. Serewedartişê Qamişlo 21 serrî peyê xo de verada. Serrgêrê 21. de kesê ke ameyê kiştene yênê yadkerdiş.
Serekê Pêroyî yê Hêzanê Surîya Demokratîk (HSD) Mazlum Ebdî hesabê xo yê Xî ser o eşkerayîyê daye û kesê ke cuya xo vîndî kerda, yad kerdî.
Eşkerayîya Mazlum Ebdî wîna ya:
“Bi munasebetê Serrgêra 12ê adare, ma pêro şehîdanê Serewedartişê Qamişlo yê 2004î yad kenê. Serewedaritiş, nîşaneyeko namdar û berz bî. Vera sîyasetê rejîmê Baasî waştişê demokrasî û aştî bî. Ma bine xêz kenîme ke ma rayîro ke înan akerdo, ê rayîrî de waştene û omidê înan roja ewroyîne de berz kenîme û danîme ramitene. Ma heqê pêro Surîyeyîjan bi rayîrê dîyalog û rêbazê aştî pawenê.”
