Fermandarê Pêroyî yê Hêzanê Sûrîya Demokratîke (HSD) Mazlum Ebdî risipî û serekeşîranê Dêrazorî reyde ame têhet.
Goreyê eşkerayîya ke hetê HSD’yî ra ameye vilakerdene; Fermandarê Pêroyî yê HSD’yî Mazlum Ebdî, Endama Fermandarîya Pêroyî ya HSD’yî û Fermandara Pêroyî ya YPJ’yî Rojhelat Efrîn, Hemsereka Komîteyê Dîyalogî bi hukmatê demkî yê Şamî reyde Foza Yûsif û Verfekê Komîteyî Yasir El Silêman, Fermandarîya Meclîsê Leşkerî yê Dêrazorî û Meclîsê Sîvîlan ê Dêrazorî xeylê serekeşîr û risipîyanê ereb reyde ameyê têhet. Xeylê serekeşîr û risipî beşdarê kombîyayîşî bîyî.
Mazlum Ebdî destpêkê kombîyayîşî de qiseykerdişêk kerd û rewşa peyêne ya sîyasî, leşkerî, ewlehî û aborî ya herême û Sûrîya erjnayî. Mazlum Ebdî wina vato: “HSD garantîya aramî û ewleyîya herême ya û do wezîfeyanê xo bêyî dizerrî û bêyî ke erey bimano, do dewam bikero.”
