Meclîsê Ciwanan ê Partîya DEM’î, mîyanê kombîyayîşê xo yê aşmayî de bi eşkerayîyê waştena pêvînayîşê Rayberê Şarê Kurdî Abdullah Ocalanî raya pêroyî de pare kerd û vat ke bi azadîya fîzîkî ya Abdullah Ocalanî xitimbîyayîşê pêvajoyî eşkenê derbas bikero.
Meclîsê Ciwanan ê Partîya DEM’î merkezê pêroyî yê partî de eşkerayîyê dê. Endamê Meclîsê Ciwanan Îbrahîm Akbayî qisey kerd û serrgera mergê Sirri Sureyya Onderî bi vîr ard. Akbayî seba serkewtene Amedspor zî pîroz kerd.
Îbrahîm Akbayî bal ant serê averşîyayîşê Rojhelatê Mîyanênî û wina vat: “Rojhelatê Mîyanênî de her tim mabênê hêzanê Modernîteya Demokratîke û modernîteya kapîtalîste de têkoşîn est bîyo. Rojhelato Mîyanên ca yo ke mifte tede ameyo vîndîkerdene o ca yo. Ewro Rojhelato Mîyanên bîyo qadê şerê dinya yê 3yine. Destkarîyê serê Rojava, Filistîn, Lubnan, Iraq û Îranî nakokîyê mîyanê hêzanê hegemonîkan vetê werte.”
‘Vengdayîşê Aştî û Civaka Demokratîke firsendêko pîl o’
Akbayî dîyar kerd ke vengdayîşê Abdullah Ocalanî yê seba Aştî û Civaka Demokratîke fersendê pîlî vetê werte û wina domna: “Ciwanê Tirkîya û Kurdîstanî seba awankerdişê netewebîyayîşê demokratîkî û demokratîkkerdişê Tirkîya xeta xo ya têkoşînî naya ro. Serê nê esasî bi kombîyayîşê şarî û atolyeyan xebatê xo kerdî.”
‘Muhatab Îmrali yo, çareserî zî Tirkîyaya Demokratîke ya’
Îbrahîm Akbayî waştena pêvînayîşê Abdullah Ocalanî reyna ard ziwan û wina qedîna: “Ma sey Meclîsê Ciwanan ê Partîya DEM’î daxwaza pêvînayîşê bi Rayberê Şaran Abdullah Ocalanî reyna raya pêroyî de pare kenê. Raya çareserîye dîyar a. Her çekuyêka ke Îmralî ra bîyero, do hîvîyan şîn bikero. Muhatab Îmrali yo û çareserî zî Tirkîyaya demokratîke ya.”
