Komeleya Ziwan û Edebîyatî (MEDYA-DER) ke 6 aşman de 24 kesan rê dersê ziwanî dayo, seba domanan sinifêk akena û wazena hûmarê wendekarî bikera 100î ser.
MEDYA-DER ke 7ê Temmuze de qezaya Tetwan a Bêdlîsî de seba averşîyayîşê kultur, ziwan û edebîyatê Kurdan dest bi xebatan kerdo, 6 aşman de di kursan de vêşêrê 20 kesan rê dersê ziwanî dayo. Komele wazena ke dewreyê ameyoxî de seba domanan zî sinifêk akero û hûmarê wendekarî bikero 100î ser.
‘Ma do kampanya bidê destpêkerdene’
Hemsereka MEDYA-DER’î Emîne Dîkmen Irgatî qisey kerd û bale ant muhîmîya têkoşîna ziwanî ya vera polîtîkayanê asîmîlasyonî. Aye va ke roja ke awan bîyê ra nat înan sewîyeya 1. û 2. de kursî akerdê û bi pêroyî 24 kesan rê dersê ziwanî dayo. Aye dîyar kerd ke aşma çeleyî de wendekaran rê belgeyê serkewtişî yenê dayene.
‘Bar dayîkan ser o yo’
Irgat bale ant ke rolêko pîl keweno dayîkan ser û wina dewam kerd: Ganî ma gedeyanê xo nê asîmîlasyonî ra bixelisnê. Seba nêy ganî xebatî hîna zêde bê û Kurdkî her ca de vila bibo. Ganî her kes ziwanê dayîke bimusno domanan, tornanan û merdimanê xo. Nê welatî de her çîyo ke Kurdî yo yeno qedexekerdene. Ganî ma nê qedexeyan ra derbaz bê û wayîrê çîyê ke qedexe bîyê, bivejîyê. Ziwanê ma dayîke estbîyayîş û cuya ma yo. Ma keyeyan, kuçeyan û her ca de Kurdkî qisey bikerê, binusê û sohbet bikerê. Ziwanê ma tena bi no qayde şêno gird bibo û aver şêro.
