Birayê Rayberê Şarê Kurdî Abdullah Ocalanî, Mehmet Ocalanî pîrozkerdişê Festîvala Rojanê Amara de vat ke rewşa Abdullah Ocalanî ya Îmralî de bi tehluke ya û wina domna: “Nika ra pey ganî ma têkoşînê xo xurt bikerê û Serekî uca ra bivejî, bîyarî miyanê şarê ey. Rewşa Serekî uca de bi tehluke ya. Ma ganî nika ra pey xebata xo seba azadbîyayîşê Serekî pîl bikerî.”
Rojbîyayîşê Rayberê Şarê Kurdî Abdullah Ocalanî yo 77. hetê bi hezaran kesan ra keyeyê Abdullah Ocalanî yê dewa Amara ya qezaya Xelfetî (Riha) de ame pîrozkerdene. Bi hezaran kesê ke qezaya Xelfetî ra kewtê rayîr, resayî dewa Amara û bi resayîşê girseyî pîrozkerdiş zî dest pêkerd. Keyeyo ke Rayberê Şarê Kurdî Abdullah Ocalan tede ameyo dinya, bi fotografanê Abdullah Ocalanî ame xemilnayene. Reyna girseyî pankarto ke ser de “Bi Rayberîya azade ver bi Yewîya Neteweyî ya Demokratîk” nusîyabi girewt û fotografê Mahsun Karaoglan û Mustafa Dagî ame girewtene ke 4ê Nîsana 2009î de pîrozkeridîşê rojbîyayîşê Rayberê Şarê Kurdî Abdullah Ocalanî de encamê hêrişê cendirmeyan de ameybî qetilkerdene.
‘Heta Rayber Ocalan azad nêbo seba ma roj çin o’
Aktîvîsta TJA Adalet Fîdan pîrozkerdişî de qisey kerd, rojbîyayayîşê Rayberê Şarê Kurdî Abdullah Ocalanî pîroz kerd û wina vat: “Ma tîya ra waştişê azadîya Rayber Apoyî kenî. Ma zî seba awankerdişê cuya komînale tax bi tax, keye bi keye rêxistinkerdîş û xoverdayîşê xo pîl bikerî. Heta azadîya fîzîkî ya Rayber Abdullah Ocalanî nêba, seba ma roj çin o. Ma do seba pîlkerdişê rêxistina xo têkoşînê xo berz bikerî.”
‘Rewşa Serekî uca de bi tehluke ya’
Birayê Rayberê Şarê Kurdî Abdullah Ocalanî, Mehmet Ocalanî zî xêrameyîşê mêmanan kerd û nê çîyî vatî: “Ma keyeyê Serekî de rojbîyayîşê ey pîroz kenî. Nika ra pey ganî ma têkoşînê xo berz bikerî û Serekî uca ra bivejî, bîyarî miyanê şarê ey. Rewşa Serekî uca de bi tehluke ya. Ganî ma nika ra pey xebata xo seba azadbîyayîşê Serekî pîl bikerî. Ez yew qiseyê Serekî zî şima reyde pare bikera. Serekî vat ke, ‘Ganî ma nika ra pey heme rêxistin û dezgehê ma xebatanê xo bi Kurdkî bikerî. Sîyasetmedarê ma yê Kurdî wextê ke ameyê tîya, ganî Kurdkî qisey bikerî. Teyna çend çekuyê Kurdkî û dima ra zî bi tirkî qiseykerdiş nêbeno.’ Rojbîyayîşê Serekê ma, ma hemînan rê pîroz bo.”
Dima ra yew welatîyî seba Rayberê Şarê Kurdî Abdullah Ocalanî şîîre wende û waştişê azadîya fîzîkî ya Abdullah Ocalanî kerd.
