Hemşaredarê Şaredarîya Pîlemûrîye Muslum Tosunî wayîrvejîyayîşê welatî û talankerdena xoza ser o qisey kerd û vat: “Mordem ke heşarê rindekîya welatê xo bî ey rê wayîr kî vejîno. Ma welatê xo de maden nêwazenîme.”
Qezaya Dêrsimî Pîlemûrîye xeylî wextî yo ke binê destê şîrketanê madenî de yena talankerdene. No semed ra Koyê Jîyara Helî, Mergê dewa Karagoze, cayê mêsanê hingimênî, Awa Gola Ana Bûyere û şarê herême zerar vîneno. Şarê Pîlemûrîye seba ke talanê şîrketan bêro vindertene û cayê neweyî nêrê akerdene, xeylê wextî yo ke xover dano û hardê xo rê wayîr vejînê. Hemşaredarê Şaredarîya Pîlemûrîye Muslum Tosunî, rindekîya Pîlemûrîye û talanê xozayî ser o ajansê ma rê qisey kerd.
‘Welatê ma de hemgênê de de weş vejîno’
Muslum Tosunî, qiseykerdîşe xo de verî rindekîya Pîlemûrîye ser o vindert û wina va: “Pîlemûrîye zaf qezayêka rindek a. Awa xo, darê xo, mergê xo, vilikê xo zaf rindek ê, to qayîl kena ke bîvînê. Ez dewa Pancilasî de nusena ro. No welat pîlanê ma ra ma rê mendo. Vanîme ke wayîr vejîme. Ma ra tepîya domanê ma yenê, nê cayî înû rê manenê. Sarê ma malcîyenîye keno, meson weye keno. Perteg û Çemîşgezak ra birê malî yenê warê ma. Mesinanê xo çîraynenê. Naxirê ma zaf ê. Pîlemûrîye de hemgênê de rind vejîno. Vilikê îtayî zaf ê, hemgênê xo kî wes o. Vazenîme ke îta nîya bimano. Maden û barajan nêwazenîme. Însanî teber da bêrê, rindekîya nê cayan bîvînê. Jîyar û dîyarê ma zaf ê, darê ma, kemerê ma, awê ma pêrûne jîyargî yê. Însanê ma sonê verê înû de qirvanû kenê, nîyaz vila kenê. Qimet bizanime. Xortanê xo rê nînan vajime. Koyê ma de heşî est ê, malê koyî est ê, ma gerê nînan ra wayîr vejîme. Gozê ma kî zaf ê. Îyê ke peyser ameyê dewanê xo newe ra darû nanê ro. Hemgênî ser o kooparatîfêk est o. Vazenîme ke hemgênê ma şêro pê dugelû, pê sûkanê pîlan.”
‘Ma pêro pîya welatê xo rê wayîr vecîme’
Muslum Tosunî, peynîya qiseykerdîşê xo de wina vat: “Kam ke welatê ma keno xiravin, ma ganî vera înan vinderîme. Ma vanîme ke, kotî weşîya xo ramnenîme ê cayî de awanê xo rê, daranê xo rê, jîyar û dîyaranê xo rê wayîr vecîme. Îyê ke teber de yenê, maden vecenê, xozaya ma talan kenê sonê. Zerê înan xoza ma rê nêdeceno. Xoza ma gerê nîya bi na rindekîye bimana. Ma raver welatê xo ra wayîr vecîme.”
