Dewa Dêrsimî Zaxgeye 1994î de pê destê eskeran ameye talkerdene. Zaxgeyij Musa Kit vano: “Naye ra di reyî yo ke 38 yeno. Rê 38î de ma qirkerdîme. Rê kî 94î de.”
Musa Kit Dewa Dêrsimî Zaxgeye de Mezra Petere de nûşeno ro. Heta serra 1994î mezra xo de terba dewijanê xo de nuşenê ro û mal û dawar kenê vweye. Heto bînî ra zî hêgayanê xo ramenê, vaşanê xo çînenê, fêkîyanê xo ra dîyarî benê. Rojêk esker yeno vano “Dewe ra vejîyê.” Musa Kit vano “Ma dewijî pêro tersanê xo ver vejîyayîme ameyîme suke.”
‘Mordemî ke hêga nêramit çi xêrê xo est o’
Mecbur manenê dewe ra vejîyenê û a roje ra nate 35 serrî yo nêeşkenê şorê dewa xo. Yenê sûka Dêrsimî de ca danê xo. Keyeyê Musa Kitî uca de şaristan de malî kenê weyî. Vano: “Mordemî ke hêga nêramit, genim û cewê mordemî ke çin bî, vaş ke nîyame çînitene xêrê mal weyîkerdene çin o.” Seba şaristanî vano nî çekûyanê xo. “Dewe wina nîya” vano. “Dewe de her çî est o” vano.
‘Pirdê dewa ma kî eskerî eşt awe’
Musa Kit verê bizanê xo de ajansê ma rê qisey keno. Wazeno şoro dewa xo la rayîr û dirbî ci rê ameyê girewtene, nêeşkeno şoro. Wîna vano: “Raya dewa ma kî giroteya. Pirdê dewa ma kî eskerî eşt awe. Raya ma cin a. Hono hona kî ma nêeşkenîme şime dewa xo, çike gêçît çin o ke ma şime. Awa Munzurî vêrnîyede ra. Nêeşkenîme şime. Ma handayê mesref kerd darî eştî ser, beton şuna lingan de kerd ro. Ma va ke, ‘No kî bariş koprîsî bo’ nêbî, nêverda. Ma zaf mesref kerd o kî reyna eskeran eşt awe û ma henî asqî de mendîme, şîme.”
‘Pîlanê ma, ma rê qalê 38î kerdêne’
Seba kesanî ke 94î de dewe ra vejîyayê, ameyê şaristan wina vano: “Înan ra kes nêmend zafêrî merdî. Kalî nêmendî. Kalî ameyêne têlewe qisey kerdêne ma ci ra meselanê dewrê verî ra bîlgî girotêne. Ma rê qalê 38î kerdêne. Ma 38î de çi qewimîyo înan ra musayîme. Naye ra di reyî yo ke 38 yeno. Rê 38 ame qirkerdî. Rê kî na ra.”
‘Dewe de zîyar û dîyarê ma est ê, mezelê ma est ê’
Musa Kit hesreta zereyê xo ya ke vera dewa xo ya wina îfade keno: “Dewe de zîyar û dîyarê ma est ê, mezelê ma est ê, ma hesret mendî me ke rê şime ser. Ma şîyêne xo rê tar ardêne, sûngî ardêne. Her çîyê ma werte de şî. Gozê ma, hêgayê ma, birê ma her çîyê ma kî henî şî.”
Musa Kit şarê Dêrsimî yo ke 1994î de dewê xo bêçare tereknayê şîyê, venga înan dano û vano “Şorê dewanê xo banan virazê. Dewanê xo şên bikerê. Milet tepîya pêyde bêro welatê ma tal meverdê.”
