Mehmet Çelîk o ke 30 serrî û 6 aşman ra pey hepisxane ra vejîya, his, fikir û şaşmendişê xo pare kerdî û vat: “Ma zî vatêne ma do rojêk vejîyê, hêvîyanê xo hîna xurt bikerê, însananê xo reyde, embazanê xo reyde, welatê xo ra bigeyrê, bihuyê. Çiyo ke ma lingan ser o vindarna, hêvîya ameyoxêko weş bi.”
Mehmet Çelîk serra 1994î de Mersîn de amebi girewtene û hetê Mehkemaya Ewleyî ya Dewlete (DGM) ra bi îdiaya “Herimnayîşê yewî û yewparetîya dewlete” cezaya hepsê muebedî ey rê ameybî dayene. Mehmet Çelîk hepisxaneyanê Konya, Burdur, Semsûr, Bolu, Îzmîr, Sêwreg û Riha de mend. Çelîk ke tewr peyên sewqê Hepisxaneyê Kandirayî yê Kocaelî de amebi kerdene, ganî kanûna 2024î de veradîyayêne. La veradayîşê ey seba ke poşmantî qebul nêkerdbî, şeş aşman ameybî astengkerdene. Mehmet Çelîk 3ê hezîran de ame veradayene û his, fikir, endîşe û şaşmendişê xo yê destpêkî ajansê ma reyde pare kerdî.
Hêvî hêzê xoverdayîşî ya
Mehmet Çelîkî da zanayene ke çîyo ke zindan de verdano ke merdim xover bido, hêvî ya, bê hêvî tu merdim nêeşkeno nê şert û mercan de xover bido û vat: “Ma her roje çend mîyanê çar dêsan de bîyî zî ma ra vete cuyêk est bî. Ma zî vatêne ma do rojêk vejîyê, na hêvîya xo xurt bikerê, însananê xo reyde, embazanê xo reyde, welatê xo de bigeyrê, bihuyê. Çiyo ke ma ser o vindarna, hêvîya ameyoxêko weş bi.”
‘Na rewşe mi rê zaf xerîb yena’
Mehmet Çelîkî seba hisanê xo yê destpêkî zî nê çîyî vatî: “Demo ke merdim hem komeli hem zî şaristanî ra ewnîyeno, merdim hisanê têmîyanan ciwîyeno, merdim şaş maneno. 30 serrî ra ver Amed şaristanêko şenik bi, her kesî yewbînan şinasnayêne. La nika demo ke merdim Amed ra ewnîyeno, Amedêka bîne ameya awankerdene. 30 serrî ra pey ti bedilîyayîşê komelî ra ewnîyenê, ti vînenî ke têkilîyanê însanan ser o zaf tesîr kerdo. Nimûne; verî her kes taxan de mendêne, her kesî yewbînan şinasnayêne. Nika her kes bînayan de ciwîyeno, berê her kesî girewte yê, kes kesî nêşinasneno, no merdim xemgîn keno. Şaristan her ke şîyo gird bîyo la têkilîyê însanan zaf qels bîyê. Ez hema zî şaş manena; verî her kesî silam dayêne yewbînan la nika kes silam nêdano kesî, demo ke ti silam danê kes cewab zî nêdano. Na rewşe mi rê xerîb yena.”
‘Her kesî xo rê dinyayêk awan kerda’
Mehmet Çelîkî çimdarîyê xo yê derheqê komelî de zî îfade kerdî û wina vat: “Mîyanê însanan de ziwanêko gerrekerdox vejîyaya meydan. No şaristan şaristanê ma yo, keyeyê ma yo, ê ke weş bikerê zî ma yê. La her kes xo anto quncikê xo, paweyê yewbînan ê, vanê wa yew bêro keyeyê mi yan zî derûdorê pak bikero. Merdim bi gerreyan nêreseno tu cayî. O bîn zî destê her kesî de telefonêk est o. Her kesî xo rê dinyayêk awan kerda, goreyê ey o tena raşt o, o tena heme çî zano. Sewbîna zî heme çî gerre yo. Merdim bieşko bineyna zî derûdorê xo ra biewnîyo, merdim eşkeno bi hewayêk nê têkilîyan reyna xurt bikero. Ganî merdim xo ra dest pêbiko.”
