Dayîka aştî Nezahat Teke ke beşdarê merasîmê îmhakerdişê çekan ê “Koma Aştî û Komelê Demokratîkî” bîye dîyar kerd ke seba mayan xelata tewr pîle aştî ya û wina vat: “Ma êdî şer nêwazenê. Aştî zerriweşî ya.”
Rayberê Şarê Kurdî Abdullah Ocalan 9ê temmuze de çarçewaya “Prosesê Aştî û Komelê Demokratîkî” de vengdayîşêko newe kerd. Nê ser o ra zî Grûba Aştî û Komelê Demokratîkî ya ke 30 endamanê PKK’yî ra ameyêne pê, 11ê temmuze de eşkefta Casenê ya Silêmanî de merasîmê îmhakerdişê çekan kerd. Vakurê Kurdîstan û Tirkîya ra xeylê sîyasetmedar, zanyar, nuştox, Dayîkê Aştî û rojnamgerî beşdarê merasîmî bîyê. Dayîkanê Aştî ra Nezahat Teke zî beşdarê merasîmî bîye.
Nezahat Teke bale ant vengdayîşê Rayberê Şarê Kurdî ê 27ê sibate ser o û vat: “Ê vengdayîşî ra pey, zerrîya ma biney rehet bîye. Seba ke bi serran o nê welatî de merdimî yenê kiştene, mayî bermenê, dewî veşenê…Dima vengdayîşê Rayberê Şarê Kurdî Abdullah Ocalanî ra pey PKK’yî xo fesih kerd, adirbest îlan kerd û çekî veşnayî. Aştî yew hetî reyde nêbena.
‘Ma gamêka bîne ver bi aştî şîyê’
Nezahat Teke bale ant merasîmê îmhakerdişê çekan ê Grûba Aştî û Komelê Demokratîkî ser o û wina vat: “Gam ake gerîlayî eşkefta ra ameyê war û pêşengîya ci cinîyêk kerd ma keyfweş bîyê. Ma gamêka bîne ver bi aştî şîyê. Bawerîya ma hîna xurt bîye. Çekî ameyê veşnayene. Demo ke ma çekan vînenê merg yeno ma vîr. Eke ê ameybî veşnayene, no hêvîyêka girde dano merdim. Ma hêvîya pîle uca ra agêrayê. Xeylê merdimî uca de bîyê, hema vaje her kes berma. No bermî yê xemgînîye nêbi, bermîyê keyfweşî bi. Zerrîya ma bi ters a. Lazim o dewlete gaman bierza.
‘Rayberê Şarê Kurdî mîmarîya aştî keno’
Nezahat Teke dîyar kerd ke eke prosesêk dest pêkerdbo, ganî ewil berê Îmraliyî bêrê akerdene û wina vat: “Rayberê Şarê Kurdî pêşengî û mîmartîya aştî keno. Seba ke o bieşko kar û xebatanê xo bi ca bîyaro ganî îmkanî bêrê awankerdene. Kar û xebatanê aştî gelekî giran ê. Dinyayî zî dî ke vengdayîşo ke o bikero erd de nêmaneno. Ma wazenê qanûnan virazê, girewteyanê heps û zindanan veradî. Komîsyono ke do Meclîs de bêro awankerdene wa destê xo bido wijdanê xo ser o. Seba ma nika deqîqe û saetî muhîm ê. Ganî dewlete gaman bierza.”
