Platformê Şubeyan ê KESK’î yê Stenbolî vera hêrişanê serê dibistanan de vernîya Mudirîyetê Perwerdeyî yê Stenbolî dest bi çalakîya nobeta cuye kerd û eşkerayî daye.
Vera hêrişan reaksîyon û çalakîyî sazgeh û sendîkayanê mamostayan dewam kenê. Plaformê Şubeyan ê KESK’î yê Stenbolî vera hêrişanê serê dibistanan yê Sewregi û Mereşî çalakî viraşte.
Platformê Şubeyan ê Konfedarasyonê Sendîkaya Karkeran ê Pêroyî (KESK) yê Stenbolî vera hêrişan û mesûlîyetê rayedaranê îktîdarî ser o vernîya Mudirîyetê Perwerdeyî yê Şaristanê Stenbolî de dest bi çalakîya “Nobeta cuye” kerd. Girse Meydanê Sultanahmetî de kom bi, tîya de bi sloganê “Neyarê mamosta û wendekaran Yusuf Tekîn îstîfa” ame vatene û heta vernîya Mudirîyetê Perwerdeyî rayra şîyê.
Badê rayîrşîyayîşî eşkerayî ameye dayene. Eşkerayî hetê Serekê Şubeyê Egîtîm Senî yê Humara 2. ê Stenbolî Hanîfî Bayindir ra ame wendene.
‘Têkoşînê ma do dewam bikero’
Hanîfî Bayindirî îfade kerd serrêk de 5 hedîseyî qewimîyayê û vat: “La xeylê hedîseyî nêameyê hesnayene. Ma sere de vanê ke pêroyê hedîseyê şidetî ganî sey komelkî bêrê vînayîş. Şidet xo ver nêvejîyeno meydan. Ewro sebebê şidetî, polîtîkayê şidetî, xizanî, bêhêvîtî û sîyasetê îktîdarî yo. O ke domananê 14-16 serrîyan keno faîl, sîstem o. Sebebê kiştişan îktîdaro sîyasî yo. Eke mamosta û wendekarî bi ters şinê dibistan sebebê nê Wezaretê Perwerdeyî yê Neteweyî Yusuf Tekîn o. Sey Egîtîm Sen heta ke perwerdeyêko demokratîk û dibistanê bêşidetî awan bibê, têkoşînê ma do dewam bikero.”
Badê qiseykerdişan çalakî qedîyaye.
