Artêşê tirk rixmo ke Prosesê Aştî û Komelê Demokratîk dewam keno reyna zî xeylê herêman de operasyonê leşkerî dewam kenê. Parlamenter Zekî Îrmez derheqê operasyonan de dîyar kerd ke nê operasyonê do zerar bidê prosesî.
Vengdayîşê Serekê MHP’yî Devlet Bahçelî û cewabê Rayberê Şarê Kurdî Abdullah Ocalanî ser o Prosesê Aştî û Komelê Demokratîkî dest pêkerd. Heta ewro xeylê hedîseyê nê prosesî de vejeyê orte. Her çend PKK’yî kongreya xo ya 12. de qerarê xofesihkerdişî dabo zî operasyonê leşkerî yê artêşê tirk ê vera Herêmanê Pawitişî yê Medya û tayê cayanê Vakurê Kurdîstanî de dewam kenê.
Wezaretê Karanê Zereyî yê Tirkîya zî dem bi dem nê operasyonanê xo keyepelê xo yê fermî de pare keno. Goreyê agahîyanê ke çimeyan dayê, artêşê tirk tewr peyên Herêma Feraşîn de zî operasyonê bejayî kerdo û derheqê operasyonî de parekerdişêk yan zî raya pêroyî reyde nêameyo parekerdene. Reyna nê çimeyan dîyar kerd ke roja 14ê êlule de qezaya Elkê ya Şirnex de hêzê artêşê tirk şîyo dewanê Tangaxana û Melîxa û operasyonêk kerdo. Derheqê encamê nê operasyonî de seba ke şîyayîşê herême qedexe yo, agahîyê hîrayî nêameyê girewtene.
Bagok de têgêrayîşê leşkerî
Reyna goreyê xebera Ajansê Mezopotamyayî; 29ê êlule de Koyê Bagokî de têgêrayîşêko leşkerî ameyo kerdene. Çimeyê herême xo resnayo înan û da zanayene ke no têgêrayîşo leşkerî sey operasyonêk ameyo kerdene û derûdorê dewa Marînî ya mîyanê Koyê Bagokî de heta şewe erey dewam kerdo.
Wezîrê Karanê Zereyî wesfanê operasyonê xo dano
27ê aşma êlule de Wezîrê Karanê Zereyî Alî Yerlîkaya hesabê xo yê Xî ser o parekerdişêk kerdo û vato şaristananê Amed, Agirî, Wan, Çewlig, Êlih, Sêrt, Colemêrg û Şirnex de xeylê operasyonê cigêrayîşî kerdî. Yerlîkaya nê parekerdişê xo de behsê herêmanê ke operasyon tede ameyo kerdene nêkeno la vano ke nê operasyonan de xeylê cebilxaneyî ameyê vînayene. Reyna Yerlîkaya nê parekerdişê xo de wesfanê artêşê tirk dano û vano operasyonî do dewam bikerê.
‘Vera prosesî provokasyon o’
Parlamenterê DEM Partî yê Şirnexî Mehmet Zekî Îrmez derheqê operasyonanê artêşê tirk de vat ke beno ke encamê nê operasyonan de provakasyonêk verjîyo orte û no do zerarêk bido prosesê Aştî û Komelê Demokratîkî.
Parlamenter Îrmez derheqê operaayonanê de hedîseyê 2015 ke Serêkanîye de amebi kerdene û 2 polîsan cuya xo vîndî kerdbî, ard vîr û wina vat: “Demo ke no hedîse Serêkanîyê de qewimîya reyna prosesêkê aştî ameyêne rayraberdene û mergê nê polîsan ra pey Erdogan vejîya û vat înan prosesî herimnayo. No hedîse bi sebeb ke 10 serranê peyênan de bi hezaran kesî cuya xo vîndî kerdbî.”
‘Ganî dewlete eşkera bikera ke ê operasyonan nêkenê’
Îrmez îfade kerd ke eke encamê operasyonanê kena artêşê tirk kena hetê Têgêrayîşê Azadîye yê kurd yan hetê hetê artêşê tirk ra vîndîbîyayeyî bibê, do na rewşe zerarêko pîl bida prosesê nikayînî û wina dewam kerd: “Destpêkê Prosesê Aştî û Komelê Demokratîkî ra heta nika dewşeta tirke operasyonanê xo domnena. No fikar keno mîyanê şarê ma. Ganî dewlete seba vindarnayîşê operasyonan raya pêroyî rê eşkerayîyêk bida ke ê êdî operasyonan nêkenê. Beno ke nê operasyonî bibê sebebê provakasyonan yan zî tayê hêzê ke wazenê proses sernêkewo, provakasyonan vejê. Encamê nê operasyonan de eke hetêk ra mergêk bibo, no do zerarêko pîl bido prosesî û beno ke proses bixetimîyo.”
Ganî dewlete lez bida prosesî
Îrmezî dîyar kerd ke seba ke proses bi hewayêko serkewte bireso encam ganî dewlete nê operasyonan vindarna û qiseykerdişê xo wina domna: “Birêz Ocalan zî qiseykerdişanê xo de dîyar kerd ke tayê hetî hemverê prosesî yê. Ma zî vengdanê dewlete ke gamanê şênberan seba prosesî bierzê. Encax bi nê hewayî ma do bieşkê nê prosesî biresnê serkewtişî.”
