Avûkate Paula Martin Ponz derheqê pêvînayîşê bi Rayberê PKK’yê Abdullah Ocalanî de wina vat: “Tirkîya neçare mende ke Ocalanî de pêvînayîş bikera.” Paula waşt ke tepişteyê sîyasîyî û Abdullah Ocalan azad bibê.
Aktîvîsta heqanê merdiman, femînîste û Avûkate Paula Martin Ponz derheqê pêvînayîşanê bi Rayberê PKK’yê Abdullah Ocalanî de ajansê ANF’yî rê qisey kerd.
Paula ard vîrî ke 2023 de înan sey heyetêkê mîyanneteweyîyî waştibi şêrê Îmrali la destûr nêdîyabi înan. Paula ard ziwan ke îşkenceyê verba Rayberê PKK’yê Abdullah Ocalanî eyn wextî de verba şarê Kurdî yo û vat: “No îşkence binpaykerdişê heqanê merdiman o. O yo ke Îmrali de qewimîyeno îşkence yo. Heyetê ma waştêne ke tedaya Tirkîya bikero ke goreyê krîteranê heqanê merdiman têbigêra. Rewşa Îmraliyî tena Tirkîya ney pêro dewletanê bînan eleqedar kena.”
Paula Martin Ponz dîyar kerd ke pêvînayîşan de ame vînayene ke fikrê Rayberê PKK’yê Abdullah Ocalanî çend muhîm ê û vat: “Tirkîya fam kerd ke hetê komelkî û sîyasî ra neçar a ke Rayberê PKK’yê Abdullah Ocalanî reyde pêvînayîşan bikera. Reyna eşkera bi ke Abdullah Ocalan tena seba Kurdan û Rojawanî ney seba heme şaranê bindestan kesêko girîng o.”
Paula Martin Ponz wina dewam kerd: “Tecrid nêqedîyayo. La hayîya Tirkîya bi hêzê Abdullah Ocalanî est a û Tirkîya neçare mende ke ey de pêvînayîş bikera. Ocalan lîderêk o û bi hawayêkê kolektîfî têgêreno. Tarîxê nê çareserîyan erjneno û seba ameyoxî zî perspektîfêkanê muhîman pêşkêş keno. Ey qewimîyayîşê Rojhelatê Mîyanênî erjnayî û çareserîyî pêşkêş kerdî. Ganî Abdullah Ocalan û tepişteyê sîyasîyî heqê hêvîye ra îstîfade bikerê. Fikrê Abdullah Ocalanî tena seba Rojhelatê Mîyanênî nê, seba dinya eşkenê aştîye bîyarê. Ez wazena ke o û pêro tepişteyê sîyasîyî azad bibê.”
