Çalakîyê ke hemverê Komployê 15ê Sibate yê vera Rayberê Şarê Kurdî Abdullah Ocalanî ameyê kerdene, çapemenîya dinya de ca girewt.
Komployê 15ê Sibata 1999î ke vera Rayberê Şarê Kurdî Abdullah Ocalanî ame kerdene, hema hema pêroyê dinya de hetê kurd û dostanê kurdan ra ame şermezarkerdene. Çapemenîya dinya bale ante hêrişanê çeteyanê HTŞ-DAÎŞ yê vera Rojava ke serrgêra Komployê Mîyanneteweyî de ameyî kerdene.
Mitîngê Strasbourgî çapemenîya Fransa de yo
Ajansê AFP’yî ke merkezê ci Fransa yo, MediaPart û 20 Minutes bi sernuşteyê, “Strasbourg de bi hezaran çalakîkerî seba azadîya rayberê şarê kurdî Ocalanî ameyê pêser” protestoyê 14ê sibate kerd manşetê xo.
Çapemenîya Îtalyayî ca da heme çalakîyanê Ewropa
Radyoya Onda d’Urto ke merkezê ci Îtalya yo, bi cumleyê, “Kurdîstan: Ocalanî serbest verade, Rojava bipawe” ca da protestoyanê ke xeylê şaristananê Îtalya de ameyê kerdene. Xebere de wina ame vatene: “Her serre nêzdîyê 15ê sibate (roja sîyaye) kurdî Ewropa û çar hetanê dinya de dostanê xo reyde meydanan de yenê têhet. Emser remnayîşê Ocalanî rastê serdemêko tarîxî yeno: Tecrubeya xorayraberdişî ya şorişgirîye ya ke Rojava de bi modelê konfederalîzmê demokratîk ê Ocalanî yeno rayraberdene, hêrişanê hukmatê demkî yê Sûrîye reyde tehlukeyê estbîyayîşî reyde rî bi rî ya.”
Reyna Agenzia Nazionale Stampa Associata (ANSA) ke merkezê ci Îtalya yo, çalakîyê protestoyî yê Îtalyayî girewtê rojevê xo û wina vat: “Mesele hêrişê qirkerdişî yê hemverê kurdan o.”
‘Ocalan hema zî şarê xo rê rayîr mojneno’
Pressenza ke a zî merkezê ci Îtalya yo, bi sernuşteyê, “Milano, newe ra seba Rojava û Ocalanî waran de yo” protestoyî kerdê manşet û wina nuşt: “Ocalan rixmê şertanê giran ê hepisxaneyî zî hema zî şarê xo rê rayîr mojneno. Şarêk est o ke ey ra hes keno û azadîya ci wazeno. Tirkîya de beno ke her tim seke her çî rayîrê xo de şono biaso, la proses vindeno; hêdî averşîyayîşê prosesê aştî zî zerar dano.”
Çalakîya Qamişloyî çapemenîya Îngîlîstanî de ya
Platformê Reuters Connect ke girêdayeyê Reutersî yo, protestoyê Qamişloyî bi sernuşteyê, “Kurdê Sûrîye Qamişlo de seba azadîya Rayberê Kurdî Abdullah Ocalanî rayîrşîyayîş kenê” xebere daye.
