Qamişlo de Komxebata Yewrêzîya Kurdî yena organîzekerdene. Komxebate de Îlham Ehmed dîyar kerd ke kerdişê konferansî nîşaneyê asta zanayîşê neteweyî yê şarê Kurdî yo û ganî cîyayîya îdeolojî mîyanê komelê Kurdî de nêbo sebebê parçebîyayîşî.
Komxebata “Yewrêzîya Kurdî: Hewayê xurtkerdişê aye û asoyê ameyoxî” baxçeyê Azadî yê şaristanê Qamişlo de dest pêkerd. Komxebate hetê Merkezê Firatî yê Cigêrayîşan ra ameyo rêxistinkerdene. Komxebate de roşnvîr, nuştox, cigêrayox, edebîyatkar, rojnameger û hunermendê Kurdî, çalakîker, temsîlkarê heme partîyê sîyasî yê Rojawanê Kurdîstanî, Rayberîya Xosere ya Kantonê Cizîrî û Vakur û Rojhelatê Sûrîyeyî, Hereketê Komelo Demokratîk (TEV-DEM) û Meclîsê Sûrîyeya Demokratîke (MSD) amade yê.
Deqeyêk rêzgirewtişî ra pey û dîyarkerdişê programê komxebate Hemsereka Dayîreyê Têkilîyanê Teberî yê Rayberîya Xosere ya Vakur û Rojhelatê Sûrîyeyî Îlham Ehmed qisey kerd.
‘Heme Kurdî vera parçebîyayîş î’
Îlham Ehmed bale asnt Konferansê Yewrêzê û Yewhelwêstê Kurdî yê Rojawanê Kurdîstanî û vat: “Heme qerarî ke konferansî de ameyê girewtene, no serdemo tarîxî de zanayîşê neteweyî û resayîşê asta tewr berze ya şarê Kurdî nîşan dano. Mîyanê heme hetanê Kurdî de zanayîşêko wina ameyo awankerdene ke her kesêk hetê xo de bi ruhê berpirsîyartî wirzeno û wazenê parçebîyayîşê Kurdan dubare nêkerê.”
‘Konferans seba pratîkkerdişê îttîfaqê Kurdî bi’
Îlham Ehmed kerdişê Konferansê Yewrêzê û Yewhelwêstê Kurdî yê Rojawanê Kurdîstanî bi seba pratîkkerdişê îttîfaqê Kurdî sey gamêka tarîxî pênase kerde û wina dewam kerd: “Rastîyêka winasîn est a ke no cîyabîyayîşê fikrî tesîrê xo dayîş û girewtişî ser o keno. Ganî ma sey zengînîye nê cîyabîyayîşî ra ewnîyenê û nêverdî ke bibê sebebê parçebîyayîşî.”
‘Ganî cayê kurdan rayberîya Sûrîyeya Demokratîke de est bo’
Îlham Ehmed dîyar kerd ke ganî cayê kurdan rayberîya newa ya Sûrîye de est bo û vat: “Mîyanê heme komelan de cîyabîyayîşê îdeolojîyî est o, la no cîyabîyayîş çiray nêbîyo sebebê parçebîyayîşî û nebîyo sebebê yewhetîye. Na nuqtayêka zaf muhîm a seba averberdişê şarê Kurdî û awankerdişê Sûrîyeya newa. Dersî ke ma tarîxî ra vejî zaf muhîm î. Ganî komel nêro parçekerdene. Ewro Tirkîya de kurd û tirkî dîyalog de yê. Eke ma bieşkê nê prosesî pîya rayra berê, ma na bawerî de yî ke seba ameyoxî na eşkenê gamanê zaf muhîm û rastan bierzê.”
Komxebate do 3 nuqteyanê bi sernameyanê “Muhîmîya xurtkerdişê yewrêzîya Kurdî” , “Hetê netweyî yê belgenameyê konferansê yewrêzîya Kurdî” û “Rolê kurdan Sûrîye de û weçînîteyê destûrî” de dewam bikero.
Komxebate dewam kena.
