Qomê Dêrsim, kiştişê Gulistan Doku ke eşkera bi, çar hetê welatî de vengê xo kerd berz. Persê xo ke dewlete rê bîyê, pers kerdê û wîna vat: “Dewlete hetî ra kişena hetî ra dana we. Çira çêneka ma kişte?”
Gulîstan Doku 6 serrî yo ke bîya vîndî. May û waya xo Gulîstan ser o xeylê fetelîyayê. May û waya xo zananyêne ke, zereyê nê karî de destê lajê Walîyî yo verênî est o. Dima ra eşkera bi ke, na mesela de gişta wezîfedaranê dewlete est a. Qomê Dêrsimî, seba Gulîstan Doku û xirabbîyayîşê welatê xo ser ajansê ma rê qisey kerd.
‘Kiştişê çêneke de destê dewlete est o’
Hatîce îpek, hardê dewrêş de ma bira û wayîme û wina vana: “Kiştişê na çêneke de dewlete û Walî est ê. 6 serrî bîyo ke vîndbîyaye ya. Hetî ra kîşenê, hetî ra danê we. Wazenîme ke sarê ma rind bo, je verên bo. Desteberê ma de tawa nîno. Tirk, kirmanc û armenî, serê hardî de je birayî û wayîme, çira ma rê qisey vanê, zulm kenê, çêneka ma kîşenê.”
‘Tena kokimê ma mendê înan zî kenê zere’
Zarîfe Kaya, vera şarê xo kerdişanê dewlete ser o wîna vat: “Xortê ma perûne qir kerdê, raye olagû ra berdî, nika kokimê ma mendê, înan zî kenê zere. Dewa ma vesnaye, ma kerdîme teber. Çike ma mendê. Kam ke qisey kerd, kenê zere, hermete tever nêbene.”
‘Welatê ma ververê laşerî de sono’
Musa Tekînî, qiseykerdîşe xo de wîna vat: “Dina bîya xirabin. Welatê ma, destê ma ra girewto. Kam ke raşt ame benê talde de kîşene û dima vanê ma çîyê henên nêkerdo.”
‘Verên de sarê ma zaf rind bi’
Aynur Tudenk, qiseykerdîşê xo de behsê şarê xo kena û wîna vat: “Heştay de ameyêne Mamekîye, sarê ma tede wendêne, destê kokim û xortan de kitabî bîyê. Domanê ma, tayînê kîşîyayê, tayînê şîyê teber, lazê mi kî şi teber, tayînê kerd zere. Poşt bîdîme jûmîn ke, merdîmê ma nêkîşîyê. Cîniyê ma, çêneka ma, lazê ma ke biaqil bê, nesonê Walî dime ra nêfetelînê. Walî ma ra hes nêkeno.”
‘Poşt bîdîme jûmîn’
Zarîfe Tunç, wîna vat: “Wext bîyo xirabin. Domanê gunek nîyê. Çîye xirabinî ma ser o çira yenê. Sarê ma jûmîn ke girewt çîyê winasînî nêbenê.”
‘Gencê ma kî şîyî her çî bi xirabin’
Gulîstan Erdogan qiseykerdişe xo de seba xortanê xo wina vat: “Dewlete vana, no kurmancê Amedî yo û berd kişt. Verên de xortê ma dest eştêne her çî. Xortê ma kî şîyê, perûne kewtê orte. Xortê ma nêmendê, perûne şîyê. Vatêne xortî ke bikerê, beno rind.”
