Cipersayîşê wendekara Zanîngeha Yuzuncu Yilî ya Wanî Rojîn Kabaîşî ke cenazeyê ey piştî 18 rocan qeraxê Gola Wanî de ameybî dîyayîş, 8 aşmî yo ke qerarê nimiteyî dewam keno. Raporê ATK’î de zaf persî bêcewab î û biryara nimiteyî ra agahî şolî yî.
wendekara Beşa Averberdişê Domanî ya Zanîngehê Yuzuncu Yilî ya Wanî Rojîn Kabaîş (21) şewa 27ê êlûnî de vîndî bîye û heta 18 rojan aye ra xeber nêame girewtene. Cuzdan, têlefon, awe û kekê Kabaîşe hetê golî de ameyî dîyayene û 28ê êlûlî de keyeyî rê xeber ameye dayene. Kabaîş Wargehê Cinîyan ê Seyyîd Fehîm Arvasî yê kampûsê zanîngehî de mendêne û tewr peyêne êrê ra vejîyaye û şîye hetê Gola Wanî yê kampusî. Keyeyê Kabaîşe ke xebera vîndîbîyayîşê keynayê xo badê 15 seatan hesnena, Amed ra ameya Wan û seba ke erê xeber daye înan, derheqê rêveberîya wargehî de gerra kenê. Pêro hewldayîşê keyeyî ke mudura wargehî reyde bêrê têhet ke keyeyê Kabaîşe mergê keynayê xo yê bi gumanî ra aye berpirsîyar vînena, bê netîce mendî.
Zaf persî bêcewab ê
Badê 18 rojan cenazeyê Rojîn Kabaîşe 15ê teşrînî de hetê Gola Wanî, Deşta Molla Kasimî de, hetê hemwelatî Mehmet Emîn Ankay (60) ra ame dîyayene. Serê dîyayîşê cenazeyê Rojîn Kabaîşe ra 8 aşmî derbas bîyî, la hîna zî binê qerarê nimiteyî ra ciperasyîş dewam keno û yew zî melûmatê neweyî nêameyî girewtene. Goreyê raporê Sazîya Tibî ya Edlî (ATK) Rojîn Kabaîşe awe de xeniqîyaya. La nê melûmatî hîna zî nêameyî safîkerdene.
Keyeyê Kabaîşe, îdîaya “xo-kiştişî” red kena û persena, “Cayê ke Rojîn vîndî bîye û cayê ke cenazeyê aye tede ame dîyayene 24 kîlometreyî dûrî yê, no senî beno?” Persî sey gelo xebatê cîgayîşî yê 18 rojan kêm mendî, cenaze hende kîlometreyî senî şî, cenaze çend rojan awe de mendo, nîşanê derbkerdişî yê serê laşê Rojînî ke ameyî dîyayene, senî bîyî, mîsalê DNA’yî yê serê cenaze ke ameyî dîyayene yê kamî yê, çî bi şarja dîyîne ya tede tiştanê aye de bîye ame, embaza Rojînî ya tewr peyêne pê reyde qisey kerde çira pêvînayîşî red kena her wina gumana “cinayetî” hîna zêdînenê. Malbata ke nê persan çiman ver dana, vana ke kênaya înan ameya kiştene û gereke kerdoxê/a cînayetê aye bêrê dîyayene.
Ek rapor zî kêm o
Raporê ATK’î yê 14ê Teşrîna Peyêne ya 2024î de ame îdîakerdiş ke Rojîn Kabaîşe awe de xeniqîyaya û yew zî nîşanê hêrişê cinsî an zî derbkerdişî nêameyî dîyayene. La, rapor de cayê xo nêdaye dema mergî û muddetê ke awe de menda. Baroya Wanî û Merkezê Heqanê Cinîyan ê Baroyî ATK’î ra derheqê dema mergê Rojîn Kabaîşe û muddetê aye yê awe de mendene de ek-raporêk waşt. Heyetê Pisporan ê Tipê Edlîyî nê waştişî de 13ê kanûnî de ek-raporêk amade kerd û nê ek-raporî de zî raporê esasî ra zêdeyêr û cîyakerdîşî çikêk nêame eşkerakerdene. Baroyî zî îtîraz derheqê nê ek-raporî de kerd.
Dozgereka newî tayînê cipersayîşî kerdî
Çileyê 2025î de dozgereka newî tayînê dosyaya Rojîn Kabaîşe ame kerdiş. Dozgerê newî waşt ke dayîke, pîyî û 3 wayanê Rojînî reyna îfade bidê û 16ê Çileyî de bi rêya SEGBÎS’î reyna îfadeyê keyeyî ame girewtene. Tewr keyeyî, nêzî 240 kesê ke îfade û mîsalê DNA’yî înan ra amebî girewtene, reyna îfade û mîsalê DNA’yî dayî. Tewr peyêne 22ê Gulana 2025î de malbata Kabaîşe dozger reyde pêvînayîş kerd. pêvînayîşo ke 2 saetan dewam kerd de pîyê Rojîn Kabaîşe Nîzamettîn Kabaîş û dayîka aye Aygul Kabaîş, Serekê Baroya Wanî Sînan Ozaraz û parêzerê Merkezê Heqanê Cinîyan ê Baroyî zî tewrê bîyî.
