Hemserekê Kongreya Gel Remzî Kartalî derheqê yewîtîya neteweyî de dîyar kerd ke şarê kurdî helwêstê xo yê semedê yewîye mojnayo û vat: “Ganî heme partîyê sîyasî, roşnvîr, akademîsyenî semedê yewîya neteweyî rolê xo bîyarê ca, vengê xo berz bikerê û helwêstê xo dîyar bikerê. Na çarçewa de ganî emser biba serra yewîya neteweyî, çareserî û azadîya şarê kurdî.”
Rayberê Şarê Kurdî Abdullah Ocalanî 27ê sibata 2025î de vengdayîşêko tarîxî kerd. Hem wextê nê vengdayîşî de hem zî dima, Abdullah Ocalan meseleyêka zaf muhîme ser o vindeno ke a zî yewîya kurdan a. Abdullah Ocalanî şeklê têkoşînî de bedilîyayîşêk kerd û semedê dewrêko newe hîmêk rona. No bedilîyayîş û hîm zî yewîye û yewbîyayîşê kurdî yo. Abdullah Ocalan nê sey qadê têkoşînî vîneno. Ocalan wextê pêvînayîşanê xo de yewîya neteweyî ser o vindeno. Meselaya yewîye sey ‘derdêko sereke’ û ‘amancêko stratejîk’ pênase keno. Şarê kurdî nika her qadî de bi vengê “Yek e Yek e Yek e, Gelê Kurd Yek e” vengdayîşê yewîye keno. Hemserekê Kongreya Gel Remzî Kartalî derheqê nê babetan de ajansê ma rê qisey kerd.
‘Nuqtaya tewr sereke û stratejîk yewîya neteweyî ya’
Remzî Kartalî dîyar kerd ke tarîxê Kurdîstanî de meseleya tewr sereke, stratejîk û nuqtaya tewr muhîme yewîya neteweyî ya û vat: “Semedê yewîye xeylê cehdî bîyî. Serra 1994î de komêka parlamenter û şaredaranê kurdan semedê dîplomasî û yewîya neteweyî vejîyayî teberê welatî. O wext Rayber Apo vatêne ke semedê şarê kurdî nuqtaya sereke yewîya neteweyî ya. Çunke eke mîyanê kurdan de yewîye nêba, hêzê mîyanneteweyî nê halî semedê sîyasetê xo şuxulnenê. Labelê hema zî tayê partîyî, bi taybetî PDK, vat, ‘yewîye muhîma a la têkilîya ma dewletanê herême reyde est a, eke ma bîyarê ca seba ma beno problem’ û xo daxilê nê karî nêkenê.”
Şarê kurdî helwêstêko bi heybet mojna
Remzî Kartalî ard vîrî ke wextê komployê mîyanneteweyî de her çar perçeyanê Kurdîstan û teberê welatî de şar werişt lingan ser û mîyanê şarî de derûdorê Rayberê Şarê Kurdî Abdullah Ocalan de yewîya neteweyî awan bîye û wina domna: “Ney ser o 27 serrî yo KNK hem semedê çareserîya her çar perçeyan hem zî semedê yewîya neteweyî xebitîyena. Dima ra serra 6ê çeleyê 2026î de Parîs de waşt Rojavayê Kurdîstanî tesfîye bikerî, labelê vera nê planî şarê kurdî her ca de bi îradeyê xo vejîya vejîya teber. No helwêstêko zaf bi heybet bi.”
‘Ganî mîyanê partîyanê kurdan de demokrasî est bo’
Remzî Kartalî dîyar kerd ke waştişê şarê kurdî yewîya neteweyî yo û wina dewam kerd: “Şarê kurdî meydanan de bi sloganê ‘Yek e yek e yek e, gelê kurd yek e’ destê xo da yewbînî. Newroza emserî de zî no waştiş vejîya vernî. Na çarçewa de mesajê Rayber Apoyî zî zelal bi: Ganî yewîya neteweyî ya demokratîke bêra awankerdene. Sîyasetê kurdî de kêmaneyê demokrasîyî est a. Senî ke ma dewletanê îşxalkeran ra demokrasî û azadî wazenê, ganî mîyanê partîyanê kurdan de zî demokrasî est bo.”
‘Çareserî yewbînan reyde girêdaye ya’
Remzî Kartalî dîyar kerd ke êdî çareserî tena parçeyêk de nîya, çareserîya her çar parçeyan yewbînî reyde gşrêdaye ya. Kartalî wina domna: “Mesela, Rojava de çi bibo, tesîrê xo her çar parçeyan ser o keno. O semed ra ganî roşnvîr, akademîsyen û rêxistinî bi hewayêko aktîf rolê xo bîyarî ca û vengê şarî ‘Gelê Kurd Yek e’ esas bigîrî.”
‘Eke yewîye nêba tehlukeyê girdî est ê’
Remzî Kartalî vat ke Rojhelatê Mîyanênî de şerê dinya yê hîrêyîn qewimîyeno û dîzaynêko newe virazîyeno, eke Kurdî nêbî yew, no bager û firtone do paweyê şarê kurdî nêvinderê. Kartalî wina vat: “Dewletê îşxalkerî kurdan sey ‘eşîr’ vînenê û vanê ‘ganî binê destê ma de biciwîyê.’ Eke partîyê sîyasî sîyasetê xo yê şaş de israr bikerî, azadîya kurdan kewena tehluke. Labelê şarê ma êdî nê meseleyan qebul nêkeno. Hêzo stratejîk şarê ma yo.”
‘Wextê azadîya şarê kurdî ameyo’
Remzî Kartalî tewr peyên vengdayîşêk kerd û wina vat: “Şarê kurdî azadîya xo tena semedê xo nêwazeno; semedê heme şaranê herême têkoşîn keno. Serra 2026î serrêka stratejîk a. Ganî emserr biba serra yewîya neteweyî, çareserî û azadîya şarê kurdî.”
