Ribêsî ke serre de reyêk koyanê Kurdîstanî de vejîyeno, dezgeyan ser o cayê xo girewt. Rotoxê ribêsan ke zabita nêverdenê ê karê xo bikerê, bi gerre yê û wazenê ke problemê înan rê çareserî bêra vînayene.
Vakurê Kurdîstanî bi ameyîşê wisarî xeylê pincarî zergûn bîyê. Nê pincarê herêmî seba weşîya merdiman sey şîfa zî yenê vînayene. Nê pincarî mîyanê şarî de zî semedê xeylê taybetmendîyanê xo yê şîfa yenê tercîhkerdene. Nê pincaran ra yew zî ribêse ya. Nameyê ribêse xeylê herêman de vurîyeno, sey; rêwas, rêvaz, rêbas, ribas jî yeno vatene. Ribêse ke tewirêkê pincarê koyanê Kurdîstanî ya, dezgeyan ser o cayê xo girewt. Herêma Serhedî taybetî şaristanî Wan, Sêrt, Colemêrg û Bedlisî de zergûn beno.
Serre de reyêk vejîyeno
Rotoxanê ribêsan ra Sebrî Çaglakî bale ant hetanê ribêse yê başan ser o û dîyar kerd ke nê ribêsî qezaya Çelê ya Colemêrgî ra seba ey yenê. Sebrî Çaglakî dîyar kerd ke ribêse serre de tena reyêk vejîyeno û vat: “Ribêse hem seba nêweşîya şekirî, hem zî seba nêweşîya tansîyonî xeylê baş o. Sewbîna kesî ke zêde kîloyê înan est o, ê zî seba kîlodayîşî sey derman vînenê. Serre de reyêk vejîyeno û ma zî seba rotişî anê tîya, la zabita û şaredarî ma rê probleman vejenê û nêverdenê ma rotiş bikerê. Ma wazenê çareserî seba ma bêro vînayene.”
Qevdêka ribêse 70-80 hezar lîre ya
Rotox Volkan Erolî zî behsê problemê xo yê şaredarî û zabitayan kerd û wina vat: “Zabitayî nêverdenê ma ribêsan biroşê. Tewr peynî de ameyê wesayîtê ma û torbeyê ribêsanê ma, ma ra girewtî. Tena aşmêk a, wa na aşme zî destûr bidê ma ke ma zî bieşkê debara xo bikerê. Her game yenê vanê no qerarê walîtî yo û vanê ke ê nêeşkenê çîyêk vajê. Qevdêka ribêse 70-80 hezar lîre ya.”
‘Şaredarî seba rotoxan astengîyan vejena’
Rotox Volkan Erenî behsê feydeyanê ribêse kerd û wina vat: “Ribêse wextê nîmeyê nîsane de vejîyeno. Dermanê nêweşîyanê sey; şekir, qanser o û xeylê nêweşîyan rê baş yeno. La şaredarî seba ma astengîyan vejena. Xora serre de tena aşmêk a, wa na aşme ma îdare bikerê. Mesrefê dezgeyêke 100 hezar lîre ra zêdeyêr a. Naye ra ma xeylê mexdûr benê.”
