Eşkerayîyanê ke Riha û Mêrdîn de ameyî kerdene de, hêrişê ke Hukmatê Demkî yê Sûrîyeye Heleb de vera Kurdan kenê, ameyî şermezarkerdene û wina ame vatene: “Hêzê mîyanneteweyî û aktorê eleqedarî ganî êdî nê temaşekerdoxî bibê, wayîr vejîyê.”
Hêrişê grûbanê paramîlîteran ê girêdayeyê Hukmatê Demkî yê Sûrîyeye ke taxanê Şêxmeqsûd û Eşrefîye ser o benê, dewam kenê. Vera nê hêrişan Mêrdîn û Riha de eşkerayîye ameyî dayene.
MÊRDÎN
Platformê Kede û Demokrasîye yê Mêrdînî hêrişî protesto kerdî. Endamê platformî ke Parka Rayîran ê Bejayî yê Artukluye de ameyî têhet, pankarta “Xwedî derketina Rojava Xwedî derketina mirovahiyê ye / Rojava xoverdayîş o, azadî ya, teslîm nêbeno” akerde. Girse, tewr zaf sloganê “Rojava, Rojhilatê Kurdîstanî yew welat o”, “Bijî berxwedana Rojava” û “Bijî berxwedana Şêxmeqsûdî” qirayî. Eşkerayîye Hetkarê DEM Partî yê Platformî Mervan Erdemî wende.
Erdemî vengê Hukmatê Demkî yê Sûrîyeye da ke cade hêrişan bido vindarnayene û vat ke nê hêrişî hem yewparebîyayîşê Sûrîyeye rê tehluke yê hem zî vera îdareyê xoserî yê demokratîkî yê ke bi xoverdayîşê şarî û pêşengîya cinîyan ronîyayo, tehlukeyêko pîl ê.
Erdemî dîyar kerd ke bi nê hêrişan organîzasyonê komelî yê ke tede cinîyî yê yenê hedef girewtene û şer şarê kurdî ser o yeno ferzkerdene û wina va: “Hêrişî raşteraşt sivîlan hedef gênê, tewr verî cinî û domanan, heqê cuye yê desan merdiman binpay kenê. Nê hêrişî vera waştişê çareserîya demokratîke û tecrubeyê îdareyê xoserî yê Rojawanî yê.”
‘Bingeyîyê Sûrîyeye rê dînamît beno’
Erdemî vist vîrî ke nê hêrişî prosesêkê winayî de yenê kerdene ke tede entegrasyonê Hêzanê Sûrîyeya Demokratîke (HSD) û artêşa Sûrîye yeno nîqaşkerdene û wina domna: “Na rewş nîşan dana ke hêzê ke zere û teber de vera çareserîye yê, wazenê nê prosesî sabote bikerê. Nê hêrişê ke kurdan hedef gênê, bingeyîyê Sûrîyeye zî dînamît kenê. Hêzê mîyanneteweyî ganî êdî sey temaşekeran nêmananê. Ganî seba pawitişê sivîlan cade mesulîyet bêro girewtene. Eke nê, ê ke Heleb de qewimîyenê, do Sûrîye de bibê sebebê xirabîyanê girdan.”
Eşkerayîye bi çepik û sloganan qedîyaye.
RIHA
Platformê Kede û Demokrasîye yê Riha zî verê Baroyê Rihaye de eşkerayîye daye. Zaf kesî tewrê eşkerayîye bîyî. Metnê çapemenîye Hemserekê Şaxa OHD’yî ya Riha Yasîn Aktaşî wend.
Aktaşî vat ke rojê ke aştîye yena qiseykerdene de, ê bi hêrişanê Şêxmeqsûd û Eşrefîye teqîb kenê û wina dewam kerd: “Ma zanenê ke nê hêrişê giranî yê ke sivîlanê taxanê kurdan hedef gênê, seba qedînayîşê hêvîya aştîya demokratîke yê. Goreyê xeberanê çimeyanê herêmîyan; Şêxmeqsûd û Eşrefîye de hêrişê topan û tankan û abloqaya hewayî dewam kenê.”
Aktaşî eşkera kerd ke netîceya hêrişan de zaf sivîlan cuya xo vîndî kerde û wina qedîna: “Hêrişî sey hedefanê leşkerîyan bêrê nîşandayene zî, di taxanê kurdan ê ke nufusê ci zaf o de yenê kerdene. No zî nîşan dano ke sivîlî bi qestî yenê hedef girewtene. Goreyê agahîyan, abloqayêka giran est a, rayîrê hetkarîyîye ameyê birnayene, xizmetê weşîye û resayîşê hewcedarîyanê bingeyîyan asteng benê. Dezgehê kurdan ê herêmî vanê ke no binpaykerdişê huqûqê mîyanneteweyî yo.”
