Seba Sakîne Cansiz ke Parîs de ameybî qetilkerdene, Dêrsim de merasîmê yadkerdişî ame kerdene.
Awankerdoxanê PKK’yî ra Sakîne Cansiz (Sara) ke paytextê Fransa Parîs de di embazanê xo Fîdan Dogan û Leyla Şaylemez reyde ameybî qetilkerdene, serrgêra 12. ya qetilkerdişê xo yê 12. de Dêrsim me mezela xo ser o ameye yadkerdene. Merasîmê yadkerdişî bi pêşengîya Partîya Têduştî û Demokrasî ya Şaran (DEM Partî), Partîya Herêman a Demokratîke (DBP) û Têgêrayîşê Cinîyanê Azad (TJA) ra ame kerdene. Hemsereka Pêroyî ya DBP’yî Çîgdem Kiliçgun Uçar û xeylê kesî beşdarê merasîmê vîrardişî bîyê.
Welatijê ke Cemxaneyê Merkezî yê Dêrsimî de ameyê tehet, ver bi goristanî rayîrşîyayîşêko girseyî kerd. Pankarto ke ser de vatişê Sakînew Cansiz, “Tarîxê Merdimîye Cinî reyde Dest Pêkeno, Merdimîye Çîyanê ke Cinî rê Keno Vîndî Keno” û dovîzê ke fotografê cinîyanê ke ameyê qetilkerdene, ameyê girewtene. Rayîrşîyayîşî de deyîra Mîkaîl Aslanî, Hîrê Canî ameye akerdene û zaf reyan sloganê, “Şehîd namirin” û “Jin jîyan azadî Sara Rojbîn Ronahî” ameyê vatene. Rixmo ke şaristanî de vewrêka çetine varayêne zî cinîyî ver bi Goristanê Asri rayra şîyê. Dimayê rêzgirewtişî çilayî ameyê veşnayene.
‘Felsefeyê Jin jîyan azadî dinya rê vila kerd’
Mezela Sakîne Cansiz ser o ewil Parlamentera DEM Partî ya Dêrsimî Ayten Kordu qisey kerd û dîyar kerd ke înan dinya rê felsefeyê ‘Jin jîyan azadî’ vila kerd, ma do têkoşînê înan rayra berê û komelê demokratîkî awan bikerê. Kordu vat ke ê bîyê çilayê rayîrê ma.
‘Sakîne Cansiz vera zîhnîyetê pederşahî têkoşînêko gird da’
Dima Hemsereka Pêroyî ya DBP’yî Çîgdem Kiliçgun Uçar qisey kerd û wina vat: “Ma seba yadkerdişê hîrê cinîyanê sîyasetmedar, şorişgir û Sakîne Cansiz a ke têkoşînê şarê kurdî ê birûmet de herindêka xorîn verdaya, tîya de yê. Tîya cayêko winasîn o ke ‘Terteleyî’ ra ver û ey ra pey rixmê heme çîyanê ke ma dîyî, reyna zî ewladanê Kurdîstanî rê, herra xo rê, nasnameyê xo rê, ziwanê xo rê, îtîqatê xo rê û têkoşînê xo rê wayîr vejîya. Sakîne Cansiz temsîlkaranê tewr muhîm ê ney bîye. Rixmê şertanê ke tede bîye şewe û roj nêvat sey cinîyêka kurd û elewî kede daye. Sakîne Cansiz vera netewe-dewlete, zîhnîyetê camêrdî û pederşahî têkoşînêko gird da.
‘Qirkedişê Dêrsimî yo dîyin o’
Rayber Apo nê qirkerdişî ser o vat, ‘No qirkerdişê Qirkerdişê Dêrsîmî yo dîyin’ o. Seba giranîya embazanê şehîd, girêdayîya xo ya têkoşînî û seba deskewteyan wina vano. Ma pêro azanê cîyayan ra tîya de yê. Ma ganî sere de Sakîne Cansiz ke Dêrsim de dest pêkerd û heme dinya rê nameyê xo vila kerd, heme cinîyan têkoşînê azadîye û aştî reyde yad bikerê û bidê ciwîyayene. Proseso. ewroyîn Aştî û Komelê Demokratîk ke ma ser o munaqeşe kenê bi saya kesanê sey Sakîne Cansiz o. Ez wazena tîya de soz bida ke seba ke no proses bi aştî, azadî biencam bibo, ma dest ra çi bêro ma do bikerê. Ma do rayîrê înan de ke bi heskerdiş, minet û hûrmet awan kerdo, rayîrşîyayîşê xo bidomnê.”
