Meclîsê Cinîyan a Şaredarîya Şaristanê Girdî, çarçewaya amadekarîyanê 8ê Adare Roja Cinîyan a Dinya de pê personelanê şaredarîye yew Koroya Cinîyan awan kerde. Cinîyê ke do 28ê Sibate de reya verêne vejîyê sahne ser, Koroya reyde wazenê vengê xo û vateyanê xo hîna berz biresnê şarî.
Meclîsê Cinîyan a Şaredarîya Amedî ya Şaristanê Girdî, çarçewaya aktîvîteyanê 8ê Adare Roja Cinîyan a Dinya de pê personelanê şaredarîye yew Koroya Cinîyan awan kerde. Cinîyê ke bi hetkarîya Serekîya Daîreya Karanê Kultur û Sosyalan rojanê dîyaran ê hewteyî de yenê pêser, xebatanê xo yê muzîkî dewam kenê. Koroya Cinîyan reya verêne 28ê Sibate de çarçewaya aktîvîteyanê 8ê Adare Roja Cinîyan a Dinya yê Meclîsê Cinîyan de Merkezê Kultur û Kongre yê Çand Amedî de programêkî de do sahne bigîro.
Endama Meclîsê Şaredarîye û organizatorê Koro Amîne Kutlay, derheqê Koroya Cinîyan û xebatanê ci de nirxnayîşî kerdî.
‘Koro do dewam bikero’
Kutlay ard vîrê şarî ke wexto ke Meclîsê Cinîyan awan kerda, derheqê awanbîyayîşê Koroya Cinîyan de qerarêko ortax ameyo girewtiş û va ke bi ardê pêserbîyayîşê cinîyan wasitayanê sosyalîzebîyayîşî zêde kerdê û eynî wext de Meclîsê Cinîyan hetê cinîyan ra fikrêk awan kerdo. Kutlay îfade kerd ke Koro çarçewaya amadekarîyanê 8ê Adare de awan bîya la ma wazenê ke demêko derg dewam bikero û va: “Tena seba 8ê Adare ney, demê ameyoxî de zî na koro do dewam bikero, ma seba naye xebatan kenê.”
‘Ma wazenê hûmare zêde bikê’
Kutlay dîyar kerd ke Koro nika 10 kesan ra yeno meydan la demê ameyoxî de ma wazenê ke hûmare zêde bikê û wina dewam kerd: “Cinîyê ke eşkenê tembur, gîtar û erbane bicenê zî do bibê. Embazê ke nika seba zêdeyîya karî nêeşkenê beşdarê Koro bibê, demê ameyoxî de do bi enstrumanê xo koro de bibê.”
‘Bêrê ma pîya dest bi 8ê Adare bikê
Kutlay dîyar kerd ke Koro do 28ê Sibate de reya verêne vejîyo sahne ser û seba naye zaf biheyecan ê û wina dewam kerd: “Badê tahribatê 8 serranê qeyuman nika Koroya ke Meclîsê Cinîyan awan kerda do vejîyo sahne ser, no zaf muhîm o. Bi taybetî ma venga şarê xo danê; 28ê Sibate de bêrê ma pîya 8ê Adare pîroz bikê. Koroya ke Meclîsê ma ya Cinîyan awan kerda, tede ma sey cinîyan estbîyayîşê xo û ganî ma xo zêde bikê, nê programî de ma pîya dest bi 8ê Adare bikê.”
