Temsîlkarê DÎSK Genel Îşî yê Êlihî Narîn Erol, Hemserekê Şubeyê SES’î yê Êlihî Cîhan Tuzun û Verfekê TMMOB’î yê Êlihî Şahîn Bavlî vengdayîşê heme kedkaran kerd ke roja 1ê Gulane meydanan de bê û vat: “Ma bi veng û rengê xo vatişanê xo, problemanê xo bîyarê ziwan.”
1ê Gulane, pêroyê dinya de sey Roja Yewîya, Paştîdayene û Têkoşînê Karkeran her ca de yeno pîrozkerdene. Xeylê şariştanê Vakûrê Kurdîstanî û Tirkîya de çalakîyanê cîyayan sey mîtîng, rayîrşîyayîş û eşkerayî çapemenî do bêrê viraştene. Nê şaristanan ra yew Êlih o. Bi pêşengîya Platformê Ked û Demokrasî yê Êlihî do 1ê Gulane de bi sloganê “Bêrê 1ê Gulane seba heqê kede, edalet, aştî û dempokrasî bibê yew” saete 13:00 de vernîya nêweşxaneyê Farabî ra heta Parka Yilmaz Guney rayîrşîyayîş bêro viraştene û badê ra eşkerayî bêro dayene. Dima ra şayî bêro viraştene. Temsîlkarê DÎSK Genel Îşî yê Êlihî Narîn Erol, Hemserekê Şubeya SES’î yê Êlihî Cîhan Tuzun û temsîlkarê Heyetê Koordînasyonê Êlihî yê TMMOB’î Şahîn Bavlî derheqê 1ê Gulane de ajansê ma rê qisey kerd û vengdayîşê tewrbîyayene yê rayîrşîyayîşî û eşkerayî kerd.
Temsîlkara DÎSK Genel Îşî yê Êlihî û endama Komîteya Amadekar ê programê 1ê Gulane Narîn Erole ard ziwan ke sîstem wayîrê fîrmayan ê girdî her tim waştêne ke karkeran bipelçiqnê û wina vat: “Hem sîstem, hem karmend û hem zî wayîrê karî, hem bi fizîkî hem zî bi hawayêko şîdet karkeran pelçiqnenê. Rojek çin a ke ma xeberanê karkerî cuya xo ra bîyê nêvînê nêbena. Ma her tim bi nê serebûtan ra rîbirî manenê. Ma eşkenê na babete de mîsal serê Şaredarîya Êlihî de bidê. Ê yê ke veng vejê karê xo ra benê. Ma sey DÎSK Genel Îşî hîrê demî yo ke vera qeyûm xover danê. Xeylê reyan babeta wina de fikrê sîyasî sey mane yenê vînayene û karkerî kar ra yenê eştene. Ê yê ke tîya de dewam kenê zî bi mobîng û surgunan ra rîbirî manenê. Ma bawerê ke tewr zêde rastê şîdetî yenê do ey meydanan de tewr zêde reaksîyonê xo bidê mojnayene. Narîn Erol vengdayîşê tewrbîyayena rayîrşîyayîşî ro heme sendîka û partîyanê sîyasî û karkeran kerd û vat: “Ma wazenê herkes bi reng û vengê xo û bi tilîlîyanê xo ê meydanî de bo.”
‘Ma aştî, azadî û demokrasî wazenê’
Hemserekê Şubeyê SES’î yê Êlihî Cîhan Tuzunî zî dîyar kerd ke sermayedarî tu wext nêwazenê xebatkarî bedêlî xebata xo bigîrê û wina qisey kerd: “Amancê ma no yo ke ma meydanan de waştişê xo yê seba kede, aştî, azadî û demokrasî bîyarê ziwan. Ma vengdayîşê şarî, cinî, ciwan û xebatkaran kenê ke tewrê rayîrşîyayîş bibê û badê eşkerayî, ma do pêro pîya roja xo pîroz bikerê.”
‘Sendîkayê zerdî heqanê karkeran nêpawenê’
Temsîlkarê Komîteya Kordînasyonê Êlihî yê TMMOB’î Şahîn Bavlî zî dîyar kerd ke sîstemê dewlete serê kesanê zengînan de ameyo awankerdene û vat ke wexto ke dewlete meaşê tewr tay dîyar kena, uca de sînorê vêşanî dîyar kena û nê çî ardî ziwan: “Kesê zengînî zî goreyê naye têgêrenê, kedkarî dîyarkerdişê komîsyonê meaşê tewr tay de nê asenê û nê zî wayîrê heqî yê. Hema vizêrî vernîya çimanê ma de bî ke 4 aşmî yo karkerê madenî heqdestê xo nêgirewto. Wexto ke sendîkayêk goreyê cayê xo xebata înan zêde bo wayîrê heqî yê. Seba ma muhîmî ya 1ê Gulane zî wina ya, ganî ma meydanan de na yewîye bidê mojnayene. Ganî ma heqê xo yê ekonomî û cuye bieşkê bîyarê ziwan. Vengdayîşê ma seba şarê ma yo ke 1ê Gulane de meydanan de bê û bi reng û vengê xo waştişê xo bîyarê ziwan û tewrê rayîrşîyayîşî bibê.”
