Xeylêk heskerdoxanê azadîye, Çapemenîya Azade seba xo kerda çeperê xoverdayîşî, cigêrayîşê heqîqetî û têkoşînê vera teşebusanê îşgalkerdişî yê ke seba çinêkerdişê cinîyan û komelî yenê kerdene. Xeylêk rojnamevananê şoreşgêran rayîrê azadîye de canê xo feda kerd, bi mîkrofon, qeleme û kamerayanê xo ala nemerdişî berz kerde. Nimûneyê nê kesanê fedayîyan ê şarê xo, Şehîde Gulistane Tara û Şehîde Hêro Behadîne yê.
Sereyê şehadetê rojnamevananê cinîyan Gulistane Tara û Hêro Behadîne ra serre vêrena ke seba teqîbkerdişê xebatanê çapemenîye hetê xo dabî herema qezaya Seyîdsadiqî ya parêzgehê Silêmanî. 23’ê Tebaxa 2024’î de netîceyê bombardûmanê teyarayanê biçek û bêmerdiman ê dewleta Tirk a îşgalkere de şehîd bîyî.
Gulistane Tara û Hêro Behadîne kam ê?
Gulistane Tara serra 1983’î de şaristanê Êlihî yê Bakurê Kurdîstanî de mîyanê yew keyeyê welatperwerî de çimê xo akerdî dinya. Dima ke a heqîqetî cigêra, aşma Gulana 1999’î de heme cuyayîşê xo feda kerd seba têkoşînê azadîye yê şarê Kurdî û Kurdîstanî. Gulistane sey cinîyêka têkoşere qadanê cîya-cîyayan de seba azadîya şarî, welatî û cinîyan xebat kerde û têkoşîn da.
Gulistane Tara serra 2000î de tewra xebatanê çapemenîye bena û nê raywanîya derge ya 24 serran a Çapemenîya Azade de heremanê cîyayan ê Kurdîstanî de, a bêvindertiş seba xeylêk sazî û dezgehanê çapemenîye xebat kerde. Başûr û Rojawanê Kurdîstanî de, a bi kameraya xo bi heme reng û hetanê xo kuçe bi kuçe qeyd kena û serê qelema xo dana xizmetê azadîya cinîyan û şarê xo.
Her wina Hêro Behadîne, serra 1992yî de qezaya Erbetî ya parêzgehê Silêmanî de ameya dinya. Hêro qismê muhendîsî yê Zanîngehê Polîteknîkî yê Silêmanî de wenda. Serra 2018’î de Kampanyaya Chatrî de sey rojnamevanêka azade dest bi xebatanê çapemenîye kena. Hêro endama Heyetê Weşanî bîye û xebatanê waranê sey teknîkê kamera, montaj, grafîk dîzaynî de gurîyaya. A qetî serê heqanê cinîyan û rojnamevananê cinîyan de bêveng nêmanena. A pawitoxêka bihêze ya etîkê rojnamevanîye bîye.
Şexsîyetê azad ê Gulistane Tara û Hêro Behadîne
Her çîyo ke derheqê cinî û Kurdîstanî de est o, netîceyê fedakarîyêka pîle yo. Çapemenîya Azade bi têkoşînê vera şîdetî resaya ewro. Yew qada ke cinîyan destpêk ra aferna, medya bîye ke hetê Gurbetellî Ersoze û embazanê sey Gulistane Tara û Rosîda Mêrdîne ra ameyêne îdarekerdene ke înan rayberîya têkoşînê cinîyan û Çapemenîya Azade kerde. Embaze Hêro Behadîne, welatperwerîya xo çarna têkoşînê organîzekerdeyî û Başûrê Kurdîstanî de rayîrê cuyayîşêkê alternatîfî ramojna cinîyan û komelî. Nika şopa têkoşînê aye dîyar a.
Têkoşînê cesaretî û xoverdayîşî yê ke asta de zaf berze de bi, yewe nê kesan ra ke no bi hawayo tewr weş ramojna, şehîde Gulistane Tara bîye. Aye seba tewrbîyayîşê xo û pozîsyonê xo yê rayberîye xeylêk bedelî dayî. Embazanê aye, a tena sey wezîfedarêka fermî nas nêkerdêne, eynî wext de zî kûrîya zerrîya xo ra aye ra hes kerdêne û sey raybera xo dîyêne.
Şehîde Gulistane Tara mohra xo da binê têkoşînê çapemenîye yê Rojawanî, Başûrî û heremanê bînan. A embazêka sade, zerrîgerm, bihurmet, ercîyaye û rinde bîye. A tim bi embazanê xo eleqedar bîyêne, samîmî û sade bîye. A têkoşer û kedkar bîye. A embazanê xo reyde cîdî û bingeyîn têwgêrayêne. Aye rastkerdiş û pîvanan ra qet game peyser nêeşte. Hem germ, hem zere ra û hem zî bi pîvan bîye. Bawerîya aye ya bi serkewtişî berze bîye. Aye têkoşînê xo bi coş û dîsîplînê xo heta nefesa xo ya peyêne dewam kerd.
Şehîde Gulistane Tara tewir û hawayê fikirîyayîşê xo de statîkê cinîyanî xo de ronîştibî. Aye rexneyê her kesî esas girewtêne. Wîjdan taybetmendîya tewr bingeyîne ya perskerdişanê aye bîye. Rayberî û xoverdayîşê cinîyan bi esil, wîjdan û bawerîye. Aye bêvindertiş seba azadîye û raştîye şer kerd û mîrasêko dewlemend xo dima ca verada. Cinîyê winayinê raşt û wêrek nê welatî de qet nêyenê vîrakerdene. A do tim bibo raybera neslê neweyî, şoreşgêran û kesanê ke wazenê tewrê têkoşînê çapemenîye yê ser şopa heqîqetî bibê.
Derheqê şehîde Hêro Behadîne de, aye xo nêsipart rolê ke modernîte û tradîsyonî serê cinîyan rê ferz kerdbî. Coka aye sey alternatîfêk xebata mîyanê Kompanyaya Chatrî de weçînite. A dima menfeetê madî û awankerdişê keyeyêkê klasîkî nêkewte û xelisîyayîşî ameyoxêko winasî de nêdî. Çunke aye zanayêne ke no do çîyêk nêdo cinîye. Hêro Behadîne her tim xo aver berdêne, têkoşînêko pîl dayêne. Aye embazanê xo ra û karê xo ra hes kerdene. A asoyanê roşn ê cinîyanê Başûrî bîye. A welatperwer û xoverdayoxe bîye, eslê cinîya Başûrî şexsîyetê xo de ramojnayêne û hêvîyê xo her tim ganî veradayêne.
Her çiqas dişmenî hedef kerd ke bi şehîdfînayîşê Gulistane Tara û Hêro Behadîne, Çapemenîya Azade Başûrê Kurdîstanî de bîyaro fekê mergî; vera hedef û xeyalê dişmenî, embaz û xebatkaranê Çapemenîya Azade soz da ke rayîrê înan teqîb bikerê û têkoşînê çapemenîye xurtêr bikerê. Çapemenîya Azade xo zêdêr organîze kerd û torêka xebate û têkoşînî ya hîrayêre akerde. Nika kamera û qelema şehîdan desta bi desan rojnamevananê cinîyan ê azadan de ya ke gorê prensîbanê Çapemenîya Azade têkoşînê xo dewam kenê û şehîdan seba xo sey nexşerayîrê têkoşînê azadîye vînenê.
