Sema Yuce, a ke semedê protestokerdişê zordarî û tedayê ke şarê kurdî ser o yenê kerdiş, bedenê xo da adirî ver, mezela xo ser o ameye yadkerdiş.
Bi pêşengîya Komela Hemkarîya bi Keyeyê Kesanê ke Bêşingê Medenîyetan de Merdimê xo Vîndî kerdî, Paştîdayîş, Kultur û Yewîye (MEBYA-DER), qezaya Dutaxî ya Agirî de, dewa Qerxelixa Jêrî de, programê yadkerdişî ame organîzekerdiş. Program de temsîlkarê rêxistinanê komelê demokratîkî û hûmarêk zêde ya welatijan amade bîyî.
Merasîm de, mezela Sema Yuce ser o ke bi vatişanê “Ez bîya Newroze, ez bîya Mazlum” çalakîya xo kerdbî, rêze ameye girewtiş. Beşdaranê programî dîyar kerdî ke ê do têkoşînê Sema Yuce û mîrasê xoverdayîşî bidomnê û wayîr ci rê vejîyê.
Mezela aye ser o qerenfîlî ameyê ronayîş û yadkerdiş bi sloganan qedîya.
