Fehîm Turgay ke serra 1982î ra heta nika Wan de şewqeyan virazeno, sey keso tewr peyên ke şaristan de bi no hewa şewqeyan virazeno, yeno şinasnayiş û Turgayî vat ke seba ke no kultur bidomîyo çi destê ci ra yeno, do biko
Fehîm Turgayî ke emrê xo yê ciwanî de dest bi viraştişê şewqeyan kerdo, wina vat: “Mi sifte serra 1982î de sey hobî dest bi viraştişê şewqeyan kerd û dima bî sey karê ma û dewam kerd. Demo ke mi dest bi kar kerd ez 12 serra bîya. Helbet gama ke mi dest pêkerd, seba pereyî kerd la nika ez bi nê karî kulturê xo pawena. Êdî karê mi, sey verê nîyo. Êdî kêmî kes şewqeyan xo ser nano.”
Dem û kultur bedilîya
Goreyê xebera MA’yî Turgayî dîyar kerd ke her herêmêk wayîrê kulturê xo yo û wina domna: “Qalibê şewqeyan ke ez nika xebitnena aîdî herêma Wanî yê û 60 serrê verê seba viraştişê şewqeyan ameyê şuxulnayîş. Heme şewqeyê ke ez virazena, pê destan ameyê viraştiş. Bi xususî yew-di tewirê heştgoşeyî es tê û ê zî êdî qet nêyenê şuxulnayîş. Eke sîparîşêk bibo, ma do bikerê. Verê her kesî şewqe xo ser nayêne la êdî kes nêdano xo ser. Verê demo ke ma kesêkî bê şewqe teber ra dîyêne, ma yarîyanê xo ci rê kerdêne la nika ma kesêkî dano serê xo bivînê, ma yarîyanê xo pê kenê. Serdem, dem, urf û edet û kultur bedilîya, êdî sey verê tehm û keyfê nê karî nêmendo. Heta ke destê mi bêro ez nê kulturî bidomno. Werrekna no kultur dewam bikerdêne. Krîzê ekonomîyî cehd keno ke ma biqedêno.”
