Akademîsyen Vahap Coşkunî derheqê Konferansê“Seserra Dîyine de Ravûrnayîşê Komara Demokratîkî” de dîyar kerd ke konferans bi di amancan ameyo viraştene û wina vat: “Yew, paştîdayîşê prosesî yo, yo dîyin zî munaqeşekerdişê problemanê huqûq û sîyasêtî yê Tirkîya yo. Problemî do senî bêrê çareserkerdene, parekerdişê fikran est o. Tena pê sîyasêtî nê problemî çareser nêbenî. Bar serê milê her kesî de yo; ganî her kes nê çarçewa de berpirsîyarîyanê xo bîyaro ca.”
Stenbol de 13 û 14ê hezîrane de bi tewrbîyayîşê zaf sîyasetmedar, roşnvîr, nuştox, akademîsyen û merdiman, konferansê bi sernameyê “Seserra Dîyine de Konferansê Ravûrnayîşê Komara Demokratîkî” ame viraştene û ravûrnayîşê komare ser o munaqeşayê muhîmî ameyî kerdene.
Akademîsyen Vahap Coşkunî muhîmî û senînîya konferansî ser o qisey kerd.
‘Ganî waştişê şarê Kurdî bêrê caardene’
Vahap Coşkunî dîyar kerd ke ganî vîraştişê qanûnan dest pêbikero û wina vat: “Seba çekronayîşê PKK’yî lazimtî bi qanûnan est a. Na babete zî xora giredayeyê çekronayîşê PKK’yî ya. Labelê meseleyê kurdî tena meseleyê çekan nîya. Seba naye ganî meseleyê kurdî de bedilnayîşê qanûnî zî bibê. Waştişê şarê kurdî est ê, ganî ê waştişî bêrê caardene. Kurdî wazenî bi ziwanê xo qisey bikerî, ganî qanûnê hemwelatîye bêro newekerdene. Şarê kurdî wazeno vatişê hemwelatîye bêro hîrakerdene. Sîstemê rayberîya herêmî bêro bedilnayene. Seba nê waştişanê şarê kurdî, ganî tewr ewil bedilnayîşê qanûnan bibo. Seba prosesî çîyo tewr muhîm qanûnê çekronayîşê PKK’yî yo. Çîyê bînî zî munaqeşa yê ke mîyanê qada sîyasetî de yenî kerdene. Têkoşînê ney zî do bêro dayene.”
‘Seba çareserîya probleman parekerdişê fikran est o’
Vahap Coşkunî dewamê qiseykerdişê xo de dîyar kerd ke ganî her di hetî zî goreyê hîsdarîya yewbînan têgêrê û wina vat: “No proses prosesêko zaf nazik o. Ganî her kes hîsdarîya hetanê bînan bivîno û goreyê ey têbigêro. Seba naye zî ganî her kes bi hawayêko baldar game bierzo. Konferansê tîya zî pê di amancan ame viraştene. Yew, paştîdayîşê seba prosesî, yo dîyin zî seba munaqeşayanê problemanê huqûq û sîyasêtî yê Tirkîya yo. Problemî do senî bêrê çareserkerdene? Na babete ser o parekerdişê fikran est o.”
‘Ganî her kes berpirsîyarîyanê xo bîyaro ca’
Vahap Coşkunî peynîya qiseykerdişê xo de îfade kerd ke zaf hetê cîyayî tewrê konferansî bîyî û wina îfade kerd: “Kam ke waşt, tewrê konferansî bibi. Mesela sazgehê sivîlî tîya de bîyê, ê zî eşkenî derheqê konferansî de kombîyayîşan organîze bikerê. Aktorê sîyasî eşkenî bi derûdorê xo reyde munaqeşa bikerê. Medya tîya de ya, medya zî eşkena na babete hîna zaf bîyara rojevê şarî. Tena pê sîyasêtî nê problemî çareser nêbenî. Bar serê milê her kesî de yo, ganî her kes zî na çarçewa de berpirsîyarîyanê xo bîyaro ca. Labelê ganî şar zî derheqê na babete de agahdar bibo. Wexto ke proses dest pê kerd, MHPyî zaf kombîyayîşî organîze kerdî. Tirkiya de zî kombîyayîşî ameyî viraştene labelê ê qêm nêkenî. Prosesê serra 2015î de hîna zaf çalakî û kombîyayîşî ameyêne viraştene. Belkî îqtîdar bi nê hawayî prosesî mîyanê aktoranê sîyasîyan de çareser bîkero. Pê nê konferansî prosesî ser o tesîrêk virazîya labelê ganî konferansê winasînî dewam bikî.”
