Seba Rojawanî Vengdayîşê Çandarî: Polîtîkaya teberî ganî goreyê rastîya Rojhelatê Mîyanênî reyna bêro organîzekerdene, Çandarî ke Heyetê Pêroyî yê Meclîsî de qisey kerd, îfade kerd ke ganî polîtîkaya teberî ya Tirkîya goreyê hedîseyanê neweyan ê Rojhelatê Mîyanênî reyna bêro organîzekerdene û veng da û va kurdanê Sûrîye reyde dîyalog bêro ronayene
Goreyê xebara Arti Gerçekî Parlamenterê Amedî yê Partîya Seypeyîye û Demokrasîya Şaran (DEM Partî) Cengîz Çandar, muzakereyanê butçe de ke Heyetê Pêroyî yê Meclîsî de dewam kenê, hedîseyanê Sûrîye ser o qisey kerd.
Çandar bale ant vatişê Wezîrê Karê Teberî Hakan Fîdanî “Kesê ke Sûrîyeyij nîyê Hêzanê Demokratîkî yê Sûrîye îdare kenê û her kes naye zano” ser o û va: “Eke qesdê ey PYD bî, serekê ci Salîh Muslîm Unîversîteya Teknîkî ya Îstanbulî ra mezun o, Kobanê ra yo, Sûrîyeyij o; kesêk nîyo ke şima ey nêşinasnê, mabênê serranê 2013-2015î de zaf rey sey mêmanê Wezaretê Karê Teberî ame Tirkîya. Eke qesdê ey YPG bî yanî YPG ke hêzê çekdarî yê Hêzanê Demokratîkî yê Sûrîye yo, serekê ey Mazlum Ebdî zî Sûrîyeyij o, Kobanê ra yo.”
‘Mazlum Ebdî dawet bîyo Washington’
Çandaîr qiseyê xo wina dewam kerdî: “Mazlum Ebdî, no maben de hetê Serekê DYA’yî ke newe weçînîyayo Donald Trumpî ra 20ê Çeleyî de seba merasîman dawet bîyo Washington. Hemsereka Îdareyê Otonomî yê Sûrîyeya Bakur û Rojhelatî Îlham Ehmed zî zaf rey Qesrê Elyseeyî de hetê Emmanuel Macronî ra ameya mêmangirewtene, a zî Efrîn ra yew Sûrîyeyije ya. Nika, fayde est o ke bêro vîrardene, ne PYD ne zî YPG hetê qet yew welatê dinya ra sey Heyetê Tehrîr el-Şamî ke nika Şamî îdare keno, sey ‘rêxistina terorî’ yan zî ‘terorîst’ nêameyê îlankerdene. Hema ewro Qiseykerdoxê Karê Teberî yê Amerîka Mîllerî tekîd kerd û va ‘Destekê ma yê Hêzanê Demokratîkî yê Sûrîye do dewam biko, vera DAÎŞ’î de hemparê ma yo eslî yo û wina zî do bimano.’
‘Ganî ma polîtîkaya xo ya teberî ra biewnîyê’
Çandarî dîyar kerd ke kurdî wazenê dîyalog bikerê û va: “Tirkîya nêşena dîyalog bikero? Ma çira kurdanê Sûrîye verdanê qada Amerîka, Fransa û heta Îsraîlî? Ê însanê ma yê. Eke Tirkîya nêşena têkilîyanê biratîya raştîne kurdan reyde bikero û aver bero, ne aştîya Tirk-Kurdan Tirkîya de şêna rona ne zî Sûrîye de ke ameyoxê aye nêdîyar o û her encamê neyînî rê akerde yo, şêna ardimê aştî, pêardişê komelkî û yewîya înan rê hetkarî biko. Ganî ma polîtîkaya xo ya teberî ra biewnîyê û nê demî de ke Rojhelato Mîyanên reyna yeno dîzaynkerdene, goreyê rastîyanê aye reyna organîze bikê.”
